Maka san totech matitlanemilikan ken tlaltikpaktlakamej

¿YOTIKITAK ika miyekej tlaltikpaktlakamej kinemiliaj ika kinnamiki melak kuajli makinnotsakan noso makinchiuilikan tlen kuajli xijkon ken oksekimej? Niman maski miyekej ijkon kinchiuiliaj, kinemiliaj ika noneki más kinmakaskej. Yejuin xtechmojkatlachialtia pampa Biblia yokijtojka ika ipan itlamiyan tonaltin tlaltikpaktlakamej san intech tlanemiliskiaj niman xtetlasojkamachiliskiaj (2 Tim. 3:2).

Desde yeuejkaui, tlaltikpakchanejkej san intech tlanemiliaj. Adán niman Eva okinemilijkej ika kinmelauaya san yejuamej kijtoskej tlenon kuajli niman tlenon xkuajli, niman aman tinochimej titlajyouijtokej pampa ijkon okichiujkej. Miyek xiuitl sakin, Uzías, akin tekiuajtiya Judá, okichiuj tlen melak xkuajli pampa okinemili ika ueliskia kitlatis kopajli ipan teopan maski xkinamikiya ijkon kichiuas (2 Crón. 26:​18, 19). Fariseos niman saduceos kinemiliayaj ika toTajtsin nonekiya más makinchiuili tlen kuajli pampa ualeuayaj itech Abrahán (Mat. 3:9).

Pampa mojmostla tikimitaj akin san intech tlanemiliaj, ueliskia peuas tikchiuaskej ijkon ken yejuamej (Gál. 5:26). Ueliskia tiknemiliskej ika techmelaua matikpiyakan se ueyi tekitl noso matechchiuilikan tlen kuajli. San ika ¿tlenon uelis tikchiuaskej niman ijkon maka matechmauakan? Kachtopa noneki tikitaskej tlenon kinemilia Jehová ijkuak yakaj ijkon kichiua. Matikimitakan ome textos ipan Biblia.

San Jehová kinamiki kijtos tlenon kinamiki tikseliskej. Matikimitakan seki neskayomej.

• Ipan se familia, Jehová kineki ika se tesiuauj makitlakaita iueuentsin, niman se teueuentsin makitlasojtla isiuatsin (Efes. 5:33). Akin yononamikti kinamiki ika ixnamik san yejua makititi ika kitlasojtla (1 Cor. 7:3). Tekoneuan noneki kintlakamatiskej intajuan, niman tatajtin noneki kintlajpiyaskej inkoneuan niman kimititiskej ika kintlasojtlaj (2 Cor. 12:14; Efes. 6:2).

• Ipan tlanechikojli, tokniuan noneki kintlakaitaskej tlayekankej ipampa nochi tlen kichiuaj (1 Tes. 5:12). San ika, tlayekankej xkinnamiki kimijliskej tokniuan nochi tlen noneki kichiuaskej (1 Ped. 5:​2, 3).

• Noneki tikintlakaitaskej tekiuajkej niman tikintlaxtlauiliskej tlen techtlajtlaniliaj pampa toTajtsin yokinkauili matekiuajtikan (Rom. 13:​1, 6, 7).

Jehová melak tetlasojtlani niman hasta techmaka tlen nion xok technamiki. Pampa titlajtlakolejkej, kinamiki matimikikan (Rom. 6:23). San ika, pampa melak techtlasojtla, Jehová techtlayokolia miyek tlen kualtsin (Sal. 103:​10, 11). Nochi tekitl niman tlateochiualistin tlen techinmaka kichiua pampa techititia iueyitetlasojtlalis tlen xtechnamiki (Rom. 12:​6-8; Efes. 2:8).

TLEN UELIS TECHPALEUIS MAKA SAN TOTECH MATITLANEMILIKAN

Noneki totlajpiyaskej niman ijkon xtitlanemiliskej ken tlaltikpakchanejkej. Tla xtotlajpiyaj, ueliskia tiknemiliskej ika tejuamej noneki más tikseliskej xijkon ken oksekimej. Sejpa, Jesús otlajto itech se neskayotl kampa okiteititi ika xouijtika peuas ijkon titlanemiliskej. Otlajto itech se tlakatl akin kitokaya uvas niman yejua okintlakeuj sekimej tlakamej akin nonekiya tekitiskej nochi tonajli niman kintlaxtlauiliskia se denario. Sakin, yejuin tlakatl okintlakeuj oksekimej akin xotekitkej nochi tonajli, niman sekimej san se hora otekitkej. San ika, ijkuak yotlayouak, nochimej okintlaxtlauili se denario. Sekimej kichiayaj más makintlaxtlauilikan pampa yotekitkaj nochi tonajli maski melak tona katka (Mat. 20:​1-16). Ika yejuin neskayotl, Jesús okimajsikamachilti inomachtijkauan ika nonekiya yolpakiskej san ika tlen toTajtsin kinmakaya.

Matitetlasojkamachilikan, maka san matiktlajtlantokan (1 Tes. 5:18). Matikchiuakan ken apóstol Pablo, yejua xokintlajtlanili tomintsin tokniuan de Corinto maski ueliskia ijkon kichiuas (1 Cor. 9:​11-14). Noijki ijkon, noneki tiktlasojkamatiskej tlen tikseliaj niman xnoneki san tiktlajtlantoskej.

Matiyolyemankej. Ijkuak yakaj melak noueyimati, kinemilia ika noneki miyek kiselis. San ika, yakaj akin ijkon tlanemilia melak kijtlakoua, kuakon, melak kuajli tla se yolyemanki pampa xijkon tlanemilis.

Teotlajtojketl Daniel otechititi kenijki tiyolyemankej yeskej. Ichanejkauan ueyixtoyaj, kualtsin tlachiaya, tlamachilise katka niman miyek ueliya kichiuaya. Kuakon yejua ueliskia kinemilis ika kema kinamikiya makipiya se ueyi tekitl niman nochimej makitlakaitakan (Dan. 1:​3, 4, 19, 20). San ika, xijkon okinemili, yejua yolyemanki katka niman ipampa yejon, Jehová okitlasojkaitak (Dan. 2:30; 10:​11, 12).

Kuakon maka san totech matitlanemilikan ken tlaltikpakchanejkej kichiuaj, yej nochipa matipaktokan ipampa tlen Jehová techmaka pampa ijkon techititia iueyitetlasojtlalis tlen xtechnamiki.