Maski san nipijpinauiya oninochiuj misionera

Oninemiko ipan 1951 ne Viena (Austria). Maski melak nipinauiya nitlajtos imiuan oksekimej, xnipinauiya niknotsas toTajtsin, niman miyekpa niknotsaya. Nochanejkauan católicos katkaj, san ika, ijkuak nikpiaya nueve años notaj opeuj nomachtia imiuan iteixpantijkauan Jehová niman sakin nonan noijki opeuj nomachtia.

Nimantsin opeuj tonechikouaj ipan se tlanechikojli tlen itoka Döbling, de Viena. San tlemach tikchiuayaj iuan nochanejkauan: titlaamapouayaj, tomachtiayaj Biblia, tiayaj tlanechikoltin niman tontlapaleuiayaj ipan ueyi tlanechikoltin. Ipan yejon tiempo, notaj onechpaleui melak maniktlasojtla Jehová. Ijkuak kichiuaya oración kitlajtlaniliaya Jehová ika nejua niman nokniuj matitochiuakan precursoras. San ika, nejua xniknemiliaya niprecursora yes.

KEN OPEUJ MÁS NIKTEKICHIUILIA JEHOVÁ

Oninoapolakti ipan 1965, ijkuak nikpiaya 14 años. Maski ijkon, nejua melak ninomojtiaya nitenojnotsas. Noijki, miyekpa niknemiliaya ika oksekimej ichpokamej akin xnomachtiaj Biblia ueliya miyek tlemach kichiuayaj niman niknekiya imiuan ninouikas. Kuakon, sakin ika oninoapolakti, opeuj ninouika imiuan ichpokamej akin xkitekichiuiliayaj Jehová. Maski melak nikuelitaya nikinnotsas, xkuajli ninomachiliaya pampa nikmatstoya ika xnonekiya miyek tiempo ninemis imiuan akin xkitlasojtlaj Jehová. San ika, xueliya nijkauaya imiuan ninouikas. ¿Tlenon onechpaleui manikintlalkaui?

Ijkuakon se ichpochtli akin kipiaya 16 años niman itoka Dorothée opeuj tenojnotsa. Onechmojkatlachialti ika melak kuelitaya tenojnotsas techajchan. Maski nejua más yeniueyi katka, xmás nontenojnotsaya. Kuakon oniknemili: “Notajuan kitekichiuiliaj Jehová, san ika, Dorothée san iselti nomachtia, niman maski noneki kitlajpiyas inan nochipa ontenojnotsa”. Yejon onechpaleui manikneki más niktekichiuilis Jehová. Sakin, tiomemej otochiujkej precursoras auxiliares niman sakin precursoras regulares. Pampa Dorothée melak yolpakiya ijkuak tenojnotsaya nejua noijki opeuj ijkon ninomachilia. Yejua onechpaleui maniknexti akinon nikmachtis Biblia. Sakin xok más nechmojtiaya nitenojnotsas techajchan, ipan ojtli niman maski san kanon.

Ijkuak yenikuikaya se xiuitl ken precursora ipan notlanechikol, oyejkok se precursor especial akin itoka Heinz. Yejua opeuj nomachtia Biblia ijkuak okitato ikniuj ne Canadá, akin iteixpantijkauj Jehová katka. Nimantsin onikuelitak ijkuak onikitak. San ika, yejua kinekiya misionero yes niman nejua ka. Ika yejon, xonikititi ika nikuelita. San ika, sakin, otochiujkej novios, otonamiktijkej niman ok titlapaleuijtoyaj ken precursores ne Austria.

ONIKNEK NINOCHIUAS MISIONERA

Heinz miyekpa nechijliaya ika kinekiya misionero yes. Maski yejua xkeman onexchiualti, kema onechpaleui maniknemili ninochiuas misionera, yejua ijkin nechtlajtoltiaya: “Aman ika xtikinpiyaj tokoneuan, ¿tleka xmás tiktekichiuiliaj Jehová?”. Yoninochiujka precursora regular maski san nipijpinaui, san ika, nikmachiliaya ika xniueliskia nimisionera yes. Maski ijkon, Heinz kemantika nechteneuiliaya tla tochiuaskej misioneros. Yejua melak onechpaleui maka san notech manitlanemili niman onechijli ika manikita kenijki nikinpaleuis oksekimej. Tlen onechijli melak onechpaleui.

Pampa noueuentsin melak onechpaleui, sakin oniknek ninochiuas misionera. Kuakon, otiktemiltijkej se solicitud para tiaskej iTlamachtil Galaad. San ika, tokniuj akin katka siervo de sucursal onechijli ika kachtopa más maninomajmachti inglés. Onikchiuj tlen onechijli, niman yeyi xiuitl sakin, otechtitlankej matitlapaleuitij ipan se tlanechikojli kampa tlajtouayaj serbocroata ne Salzburgo (Austria). Ompa otitenojnotskej chikome xiuitl ika yejon tlajtojli, san ika, se xiuitl noueuentsin otlapaleui ken tlayekanketl ipan circuito. Maski melak ouijtika katka yejon tlajtojli, melak miyekej tikinmachtiayaj.

Ipan 1979, tokniuan akin tlayekanayaj ipan sucursal otechijlijkej matiakan Bulgaria. Pampa ompa xnotekauiliaya manotenojnotsa, otechijlijkej matikteijlikan ika san tonpaxaloskiaj. Tejuamej xtontenojnotsaskiaj, otechijlijkej san ichtaka matikinmakatij amatlajkuiloltin pitentsitsintin makuiltin tokniuan siuamej akin nemiyaj Sofía, icapital Bulgaria. Melak ninomojtiaya, san ika, Jehová onechpaleui. Ijkuak onikimitak kenijki yejon tokniuan melak yolchikaujkej katkaj niman yolpakiya maski ueliskia kintsakuaskej, onechpaleui más manitlaneltoka itech Jehová niman manikmatsto ika yejua uelis nechpaleuis maski san tlenon matechtlajtlanili ikalpan matikchiuakan.

Sakin, oksejpa otiktemiltijkej se solicitud para tiaskej Galaad, san ika, aman kema otechnotskej. Otiknemilijkej ika tiaskiaj Estados Unidos niman techmachtiskiaj ika inglés. San ika, ipan noviembre de 1981 opeuj kipanoltiaj iTlamachtil Galaad ipan sucursal de Wiesbaden (Alemania). Niman pampa otechmachtijkej ika alemán, ouel más onikasikamat. ¿Kanon techontitlaniskiaj?

OTECHONTITLANKEJ KEN MISIONEROS KAMPA MELAK XKUAJLI TLEN NOCHIUAYA

Otechtitlankej Kenia, san ika, tokniuan akin tlayekanayaj sucursal otechtlajtoltijkej tla tiknektoyaj matechontitlanikan Uganda, tlen ompa nisiuj onkatka. 10 xiuitl achto, se general akin itoka Idi Amin okitlan tekiuaj akin tlayekanaya Uganda. Ijkuak yejua tlayekantoya, melak miyekej omijkej niman otlajyouijkej. Sakin, ipan 1979, itlauelikniuan Idi Amin xok okikauilijkej matlayekana Uganda. Aman uelis nenkajsikamatiskej tleka ninomojtiaya nias ipan se país kampa melak xkuajli tlen nochiuaya ipampa guerra. San ika, Galaad otechpaleui más manitlaneltoka itech Jehová, kuakon otiknejkej tiaskej.

Ne Uganda melak xkuajli tlen panouaya. Tekiuaj xkitemakaya atl, tlauijli niman okseki tlen techpolouaya. Noijki xonkatka señal de teléfono. Nomiktilouaya niman tetlachtekiliayan niman más ijkon panouaya ijkuak yetlayoua katka. Kuakon, miyekej xok kisayaj inchan niman kitlajtlaniliayaj toTajtsin maka yakaj makintlaxtekiliti noso makinmiktiti. Maski melak xkuajli tlen panotoya, tokniuan melajkanemiyaj itech Jehová.

Ipan 1982, otajsikej Kampala icapital Uganda. Makuijli metstin imiuan otichantitoj Sam niman Christina Waiswa, yejuamej kipiaya makuiltin inkoneuan pipitikej niman noijki ompa chantiyaj nauimej inchanejkauan. Yejuamej techmakayaj tlen kipiayaj maski kemantika san ueliyaj tlakuayaj sejpa ipan se tonajli, yejon melak techmojkatlachialtiaya. Melak miyek tlen kualtsin otechmachtijkej tlen techpaleuiskia ipan tonemilis ken misioneros. Otiuelkej san ika achijtsin atl taltiskej niman yejon atl sakin tiktekitiltiayaj para baño. Ipan 1983, ompa Kampala otiknextijkej se kajli tlen onkatka kampa xmás panouaya tlen xkuajli.

Melak tikuelitayaj titenojnotsaskej. Nikilnamiki ika sejpatipan ipan se metstli otikintemakakej ipantsin 4,000 revistas. San ika, melak tikuelitayaj tikitaskej kenijki tlaltikpakchanejkej melak kuelitayaj kikakiskej iTlajtol toTajtsin. Nejua niman noueuentsin tikinpiayaj kanaj 10 noso hasta 15 akin tikinmachtiayaj niman melak miyek tlen intech tiueliyaj. Yejuamej san nejnemiyaj para yaskej tlanechikoltin, maski ijkon, xkeman itlaj kijtouayaj niman nochipa melak yolpakiyaj.

Ipan 1985 niman 1986 oksejpa onochiujkej ome guerras ne Uganda. Miyekpa tikinmitayaj kokonej akin kinpiayaj pistolas niman tlajpiayaj ipan carreteras. Tiktlajtlaniliayaj Jehová matechpaleui matikitakan kanon tontenojnotsaskej kampa maka itlaj topan manochiua niman Jehová nochipa otechpaleui. Niman ijkuak tiknextiayaj yakaj akin kinekiya más kimatis itech Biblia hasta tikilkauayaj tlen techmojtiaya.

Melak tikuelitayaj tikinnojnotsaskej akin ualeuayaj okse país. Tejuamej otikinmachtijkej Murat niman isiuauj Dilbar Ibatullin akin ualeuayaj Tartaristán (Rusia central). Murat katka doctor, yejua iuan isiuauj onoapolaktijkej niman hasta aman ok kitekichiuilijtokej Jehová. Sakin, onikixmat se siuatl akin itoka Tatjana Vileyska, akin ualeuaya Ucrania, yejua kipiaya depresión niman yokinemilijka nomiktis. Sakin ika onoapolakti Tatjana, onokuep ipaís niman opeuj tlapaleuiya kampa kintlajtolkuepaj toamatlajkuiloluaj ika tlajtojli Ucraniano.a

OKSEKAN TECHONTITLANIJ KEN MISIONEROS

Ipan 1991, ijkuak tipaxalojtinemiyaj Austria, tokniuan akin nemiyaj isucursal Austria otechonnotskej niman otechijlijkej ika aman techtitlaniskiaj Bulgaria. Ompa miyek xiujtin xonotekauili manotenojnotsa niman ipan okseki países tlen onkatkaj Europa. San ika, aman yokinkauilijkaj iteixpantijkauan Jehová matenojnotsakan ipan yejon países niman noijki Bulgaria yeueliskia notenojnotsas. Ken yonikijtoka, tejuamej ompa san ichtaka otikimitkikaj toamatlajkuiloluan, san ika, aman techtitlaniyaj ompa matitenojnotsatij.

Otechijlijkej maka sa matokuepakan Uganda. Kuakon, xok ouel otikuitoj tlen ompa tikpiayaj nion xouel otikinpachouititoj noso otikinnauatitoj tokniuan, pampa nimantsin otiajkej Betel tlen onkatka Alemania, ompa otechmakakej se carro tlen ipan tiaskiaj Bulgaria. Niman otechijlijkej ika ijkuak tajsiskiaj Sofía, tinemiskiaj ipan se grupo kampa nemiyaj 20 tenojnotskej.

Ne Bulgaria noijki miyek tlen otikixnamikkej. Tejuamej xtiueliyaj tlajtojli búlgaro. Noijki, san onkatka ome amatlajkuiloltin ika yejon tlajtojli: La verdad que lleva a vida eterna niman Mi libro de historias bíblicas. Niman melak ouijtika katka tikinnextiskej akin tikinmachtiskej. Maski ijkon, tokniuan akin nemiyaj ipan togrupo melak kuelitayaj tenojnotsaskej. San ika, akin nemiyaj ipan religión ortodoxa xokuelitakej ika titenojnotsayaj, kuakon, opeuj techtlaueltokaj.

Ipan 1994, Gobierno okijto ika iteixpantijkauan Jehová xok yeskiaj se religión. Niman miyekej akin ompa chantiyaj kinemiliayaj ika iteixpantijkauan Jehová melak xkuajli tlen kitechiuiliayaj. Ipampa yejon, sekimej tokniuan okintsajkej. Ipan noticias noijtouaya miyek tlen xmelauak totech, kijtouayaj ika iteixpantijkauan Jehová kinkauiliaya mamikikan inkoneuan niman ika kimijliayaj oksekimej manomiktikan. Ika yejon, melak ouijtika katka titenojnotsaskej. Miyekpa akin techitayaj ika tinenojnotstinemiyaj techtsajtsiliayaj, san tlemach techontlajkaliliayaj niman kominnotsayaj policías. Noijki, melak ouijtika katka tikinseliskej toamatlajkuiloluan niman tiknextiskej se kajli kampa tikinpiyaskej totlanechikoluan. Sejpa, policías oajsikej kampa tikpixtoyaj toueyitlanechikol niman otechteltilijkej. Tejuamej xkeman ijkon tikitayaj. ¡Ne Uganda xijkon katkaj, ompa melak kualtsin technotsayaj niman techkakiyaj ijkuak titenojnotsayaj! ¿Tlenon otechpaleui nochipa matiyolpakikan?

Melak otechpaleui pampa imiuan otinenkej tokniuan. Yejuamej melak yolpakiyaj pampa yokixmatkaj Jehová niman melak kitlasojkamatiyaj pampa imiuan tinemiyaj. San sekan toyolchikauayaj niman titopaleuiayaj. Heinz niman nejua otiuelkej ika uelis tiyolpakiskej maski san kanon techtitlaniskej tla tikitayaj kenijki tikinpaleuiskej oksekimej niman tla xsan tiknemilijtoyaj tlen tikixnamiktoyaj.

Seki xiujtin sakin, oksejpa ouel titenojnotsaj. Ipan 1998, tekiuaj okijto ika iteixpantijkauan Jehová oksejpa yeskiaj se religión, niman opeuj notlajtolkuepa toamatlajkuiloluan ika tlajtojli búlgaro. Ipan 2004 okichijchiujkej se yenkuik sucursal. Aman ne Bulgaria onokej 57 tlanechikoltin niman nemij 2,953 tenojnotskej. Ipan 2024 onosentlalijkej 6,475 ipan Conmemoración. Niman ne Sofía, kampa sa nemiyaj makuiltin tokniuan siuamej, aman onokej nueve tlanechikoltin. Kuajli yotikitakej ken yonochiuj yejuin teotlajtojli kampa kijtoua: “In keskimej nokoneuan miyekiyaskej hasta ajsiskej miles” (Is. 60:22).

TLEN OTIKIXNAMIJKEJ

Miyekpa yonechinnextilijkaj tumores, se nikpiaya ipan notsontekon. Ne India onexchiuilijkej radioterapia niman se operación tlen ouejkauj 12 horas kampa san seki onechkixtilijkej tumor. Sakin onechuikakej isucursal India ompa otinenkej hasta ijkuak achijtsin onipajtik niman sakin oksejpa otokuepkej Bulgaria.

Ijkuakon, Heinz noijki okijlijkej ika kipiaya se kokolistli tlen itoka Huntington, tlen ualeuaya intech ichanejkauan. Sakin, Heinz opeuj más kitekiyomaka nejnemis, tlajtlajtos niman san noyejua noteltis ijkuak noliniaya. Pampa más tlanaujtiaya nonekiya más niktlajpiyas, kemantika melak nisiauiya niman nechajmanaya tla xok ueliskia niktlajpiyas. San ika, se tokniuj telpochtli akin itoka Bobi kuikaya iuan ontenojnotsas. Yejua xpinauiya kuikas noueuentsin maski xmás ueliya nejnemiya, tlajtouaya niman xueliya san iselti noteltiaya ijkuak noliniaya. Ijkuak niknekiya yakaj manechpaleui makitlajpiya noueuentsin, Bobi nochipa nechpaleuiaya. Tejuamej otitlapejpenijkej xtikinpiyaskej tokoneuan, san ika, Bobi yeskia ken se tokoneuj akin Jehová otechmakak (Mar. 10:​29, 30).

Noueuentsin Heinz noijki okipix cáncer niman omik ipan 2015. Melak niktemouaya, yejua nochipa nechpaleuiaya maka melak maninajmana. Xueliya nikneltokaya ika xok nouan nemiya. San ika, xkeman nikilkauas kenijki iuan oninen (Luc. 20:38). Kemantika nikilnamiki kenijki tlajtouaya, tlenon kualtsin nechijliaya niman kenijki melak nechpaleuiaya. Melak niyolpaki pampa san sekan otiktekichiuilijkej Jehová.

NIKTLASOJKAMACHILIA JEHOVÁ PAMPA ONECHPALEUI

Jehová melak onechpaleui manitlaxiko. Noijki yonechpaleui maniktekichiuili ken nimisionera niman manikimititi tlaltikpakchanejkej ika nikintlasojtla maski melak nipinauiya (2 Tim. 1:7). Niktlasojkamachilia Jehová, ika nejua niman nokniuj akin más pitentsin ueli chikauak tiktekichiuiliaj. Nokniuj niman iueuentsin nemij ken tlayekankej ipan circuito, yejuamej komintlajpalouaj tokniuan akin chantij Europa kampa tlajtouaj serbio. Kuajli onikitak kenijki Jehová okinankili notaj tlen okitlajtlanili ijkuak tipitentsitsintin katkaj.

Mojmostla ninomachtia Biblia niman yonechpaleui kuajli maninomachili. Nejua miyek yonikixnamik, ika yejon, yoniuel ika noneki más nikchiuas oración, ijkon ken Jesús okichiuj (Luc. 22:44). Yonikitak kenijki Jehová kinnankilia nooraciones intechkopa tokniuan akin nechititiaj ika nechtlasojtlaj niman nemij ipan notlanechikol Nadezhda (Sofía). Yejuamej nechnotsaj maniuiya inchan niman nechijliaj ika melak nechtlasojtlaj niman yejon kichiua melak maniyolpaki.

Nochipa nikonnemilia ijkuak yoliuiskej akin yomijkej. Nikuelita nikonnemilia kenijki san sekan tinemiskej ipan xochitlalpan iuan nochanejkauan: kenijki notajuan kualtsin nesij ijkon ken ijkuak ononamiktijkej, nokniuj tlakualchiujtok niman noueuentsin Heinz nentok iuan icaballo. Ijkuak ijkon nitlanemilia, nechpaleuiya maka melak maninajmana niman san maniktlasojkamachili Jehová ipampa nochi tlen nechmaka.

Ijkuak nikonnemilia nochi tlen yonikixnamik niman tlen nikselis ika tlayekapan, ninomachilia ijkon ken David, akin okijto: “Pero nejua nikmati ika nikitas motetlajsojtlalis chika ninemi ipan in tlaltikpaktli. ¡Xtlali moyojlo itech toTEKO! ¡Xmoyoleua niman xmoyolchikaua! ¡Kemaj, xtlali moyojlo itech toTEKO!” (Sal. 27:​13, 14).