¿ToTajtsin okichijchiuj nochi tlen yoltika ika evolución?

Tlen Biblia kijtoua

Biblia kuajli kijtoua ika toTajtsin yejua akin okichijchiuj tlen yoltika,a kema, yejua otexchijchiuj, okinchijchiuj miyek yolkamej niman miyek plantas (Génesis 1:12, 21, 25, 27; Apocalipsis 4:11). Biblia kijtoua ika tejuamej tiualeuaj itech Adán iuan Eva (Génesis 3:20; 4:1). Miyekej kijtouaj ika toTajtsin okichijchiuj nochi tlen yoltika ika evolución. San ika, Biblia kuajli techijlia ika toTajtsin xijkon otlachijchiuj. Aman tej, ciencia kijtoua ika nochi tlen yoltok uelis achijtsin nopatlas. ¿Tlenon kijtoua Biblia itech yejuin? Biblia xkijtoua tla yejuin xmelauak.b

• ¿Tlenon kineltokaj miyekej?

• ¿Tlen temachtia evolución notlajtolnamiki iuan Biblia?

• ¿Uelis titlaneltokaskej itech evolución san pampa yonoitak ika tlen yoltika ueli achijtsin nopatla?

¿Tlenon kineltokaj miyekej?

Miyekej tlaneltoka itech evolución teística, san ika ¿tlenon kijtosneki yejuin? Miyek tlen uelis kijtosnekis. San matikonteneuakan yejuin, Encyclopædia Britannica kijtoua ika yejuin kijtosneki ika toTajtsin kichiua ika yolkamej niman plantas manopatlatiakan niman ijkon san manokauakan uan más kuajli ueli nomatij niman mamikikan uan xueli nomatij.

Evolución teística noijki yejuin uelis teasikamachiltis:

• Nochi yolkamej niman plantas ualeuaj itech okseki yolkamej noso plantas tlen desde yeuejkaui ionkatkaj noso inemiyaj.

• Nochi tlen yoltika yolik nopatlatiuj niman ijkon nochiua itlaj okse. Yejuin tlen nochiua noixmati ken macroevolución.

• ToTajtsin yejua akin kichiua ika nochi manopatlatiuj.

¿Tlen temachtia evolución notlajtolnamiki iuan Biblia?

Tla nochi tlen yotikonteneujkej melauak yeskia, kuakon kijtosnekiskia ika seki tlen kiteneua Génesis xmelauak. San ika, ijkuak Jesús otlajto itech tlen noteneua ipan Génesis, okiteneuj ken itlaj tlen melauak opanok (Génesis 1:26, 27; 2:18-24; Mateo 19:4-6). Biblia kijtoua ika ijkuak Jesús xiuajlaya ipan tlaltikpaktli, nemiya ne iluikak iuan toTajtsin niman ika yejua okipaleui toTajtsin makichijchiua “nochi on tlajtlamach tlen onkaj” (Juan 1:3). Ika yejon, uelis tikijtoskej ika Biblia xkijtoua tla toTajtsin otlachijchiuj ika evolución.

¿Uelis titlaneltokaskej itech evolución san pampa yonoitak ika tlen yoltika ueli achijtsin nopatla?

Biblia xkijtoua hasta kech uelis nopatlas se yolkatl noso se planta, nion xkijtoua kechpa uelis nopatlas. Noijki xkijtoua tla xmelauak ika yolkamej niman plantas ueli achijtsin nopatlaj ijkuak nomiyekiliaj noso ijkuak nopatlaj de lugar. Ijkuak sekimej kitaj ika kemantika ijkin nochiua, kinemiliaj ika yejon evolución, san ika, ijkuak ijkon panoua, xnochijchiua okse planta noso yolkatl.