Tosentlaliaj ika videoconferencia

Ipan miyek países, tekiuajkej yokinnauatijkej tlaltikpakchanejkej maka melak manonisiuikan niman maka manosentlalikan. Tejuamej ken iteixpantijkauan Jehová tikintlakamatij tekiuajkej, ika yejon yopeuj tiktekitiltiaj aplicación itoka Zoom niman ijkon tosentlaliskej ika videoconferencia.

Grupo akin Tlayekana okijto ika uelis notekitiltis seki tomintsin tlen tiktemakaj niman ijkon nochi tlanechikoltin kinkouiliskiaj se cuenta ipan Zoom. Yejuin melak yotepaleui pampa seki tlanechikoltin xueliyaj kitlaxtlauayaj 15 noso 20 dólares para kipiyaskej se cuenta ipan Zoom. Seki tlanechikoltin kintekitiltiayaj aplicaciones kampa xnotlaxtlaua, san ika, yejon aplicaciones xkinkauiliaj miyekej makalakikan. Nochi tlanechikoltin tlen kitekitiltiaj se cuenta ipan Zoom tlen yonotlaxtlauj, ueli kitaj akinomej kalakij niman miyekej uelij ompa nosentlaliaj. Niman aman, ipan 170 países, 65,000 tlanechikoltin kintekitiltiaj yejuin cuentas.

Tlanechikojli Kairagi, tlen onka Manado (ipan provincia de Célebes Septentrional, Indonesia), opeuj kitekitiltia cuenta ipan Zoom tlen yonotlaxtlauj. Tokniuj Hadi Santoso kijtoua: “Hasta tokniuan akin xmás uelij kitekitiltiaj tecnología uelij kitaj tlanechikojli pampa xmiyekpa noneki kalaktoskej ipan aplicación”.

Léster Jijón, se tlayekanketl akin nemi ipan tlanechikojli Guayacanes Oeste, ne Guayaquil (Ecuador), kijtoua: “Pampa miyekej tokniuan xkipiyaj miyek tomin, miyekej tlanechikoltin xueliskiaj kitlaxtlauaskiaj se cuenta ipan Zoom kampa nochimej ueliskiaj nosentlaliskiaj. San ika, aman, pampa ikalpan toTajtsin yokitlaxtlauj cuenta ipan Zoom, miyekej ueli tikalakij ipan se tlanechikojli. Noijki ueli miyekej tikinnotsaj makalakikan ipan tlanechikojli”.

Johnson Mwanza, se tokniuj akin nemi ipan tlanechikojli Norte Ngwerere, ne Lusaka (Zambia), okijkuilo: “Tokniuan miyekpa yotechijlikej: ‘Zoom tlen yokitlaxtlauj ikalpan toTajtsin yotechpaleui más matikinnisiuikan tokniuan, niman yotikitakej ika Jehová melak techtlasojtla’”.

Yejuin cuentas de Zoom onokoujkej ika tomin tlen notekitiltia ijkuak tlaixpoliui. Yejuin tomin nokixtia itech tomintsin tlen tiktemakaj. Miyekej kitemakaj intomintsin ipan donate.jw.org. Timechtlasojkamachiliaj ipampa tomin tlen nenkitemakaj, yejuin tomin noijki notekitiltia ijkuak kanaj tlaixpoliui (2 Corintios 8:14).