¿KENON NOYEKTLALIS TLEN PANOTIKA?

ITekiuajyo toTajtsin kichiuas maonia yolseuilistli

Sa achijtsin poliui ika iTekiuajyo toTajtsin peuas kiyekanas nochi tlaltikpaktli. Yejuin Tekiuajyotl kichiuas ika tinochimej matinemikan ika toyojlo niman maka itlaj matechxelo. Ipan Salmo 72:7 toTajtsin kuajli yokijto ika onias yolseuilistli ipan tlaltikpaktli. San ika ¿kemanon peuas tlayekanas iTekiuajyo toTajtsin? ¿Kenon tlayekanas? ¿Kenon uelis mitspaleuis iTekiuajyo toTajtsin?

¿KEMANON PEUAS TLAYEKANAS ITEKIUAJYO TOTAJTSIN?

Ipan Biblia ijkuiliujtika “tlinon tlamauisojli” tikitaskiaj ijkuak iajsitoskia tonajli ijkuak tlayekanas iTekiuajyo toTajtsin. Kijtoua ika oniaskia guerras, apistli, kokolistli, miyekan tlalolinis niman miyekiyas tlen xkuajli (Mateo 24:3, 7, 12; Lucas 21:11; Apocalipsis 6:2-8).

Biblia okseki kiteneua tlen nochiuaskia itlamiyan tonaltin, kijtoua: “On tlakamej ijkin nouikaskej: sanoyej notlajsojtlaskej sano yejuamej, sanoyej tominnekiskej, [...] xkintlakamatiskej intajuan, xitlaj kitlajsojkamatiskej, [...] xkintlajsojtlaskej oksekimej nion xteikneliskej, chakuamej yeskej, xkiteltiskej iminxkuajlieleuilis, sanoyej xipanteitaskej niman xitlaj kuelitaskej tlen kuajli. [...] Noueyimatiskej, sanoyej kinekiskej nopaktiskej, niman xkinekiskej kipaktiskej Dios” (2 Timoteo 3:1-4). Yemelak ika akin xkuajkualtin xsan aman yopeujkej nemij, san ika, aman más yomiyekiyakej.

Yejuin tlen toTajtsin yeuejkaui okijto, opeuj nochiua ipan 1914. Miyekej ixtlamatkej akin nomachtiaj tlen yeuejkaui opanok yokitakej ika yejuin tlaltikpaktli opeuj nopatla ipan yejon xiuitl. Ixtlamatki danés Peter Munch okijkuilojka ika nochi onopatlak ijkuak opeuj guerra ipan 1914. Okijto ika ijkuak xiajsiya yejon xiuitl, miyekej tlaltikpakchanejkej kuajli nemiyaj, san ika, sakin opeuj tlaijtlakaui, nochiua tlen xkuajli, nochiuiyan opoliuj yolseuilistli niman miyekej opeujkej tetlauelitaj.

San ika, xnochipa ijkon yes. Ika tlayekapan onias yolseuilistli. Nochi tlen panotika techititia ika sa achijtsin poliui ika iTekiuajyo toTajtsin kiyekanas tlaltikpaktli. Jesús noijki okiteneuj ika nochiuaskia itlaj tlen kuajli ijkuak iajsitoskia yejon tonajli, yejua okijto: “Niman yejuin kuajli tlajtoltin itech Tekiuajyotl notenojnotsas ipan nochi tlaltikpaktli niman ijkon nochimej kalpamej makimatikan, niman kuakon tlapopoliuis ipan yejuin tlaltikpaktli” (Mateo 24:14, TNM).

Iteixpantijkauan Jehová kiteijliaj yejuin kuajli tlajtoltin ijkuak tenojnotsaj. Niman hasta revista tlen kixelouaj itoka Amatl Tekakistilijketl Kiteijlitika iTekiuajyo Jehová. Yejuin revista kiteneua tlenon kichiuas iTekiuajyo toTajtsin ipampa tlaltikpaktli niman inpampa tlaltikpakchanejkej.

¿KENON TLAYEKANAS ITEKIUAJYO TOTAJTSIN?

Matikitakan naui tlemach tlen techpaleuis matikmatikan:

ITekiuajyo toTajtsin xkikauilis ika nion se político ompa matlanauati.
Políticos xkinekiskej makintekipatlakan niman kixnamikiskej iTekiuajyo toTajtsin maski xkitlaniskej (Salmo 2:2-9).
ITekiuajyo toTajtsin kinpopolos tekiuajyomej pampa xkinekiskej kikajkauaskej ika tlanauatiskej (Daniel 2:44; Apocalipsis 19:17-21). Guerra kampa kinpopoloskej itoka Armagedón (Apocalipsis 16:14, 16).
Akin kinekiskej nemiskej kampa tlayekanas iTekiuajyo toTajtsin makisaskej itech Armagedón niman nemiskej ipan se tlaltikpaktli kampa onias yolseuilistli. Kanaj millones yeskej pampa Biblia kijtoua ika makisas “sanoyej miyek tlakatl” (Apocalipsis 7:9, 10, 13, 14).

¿TLENON KICHIUAS ITEKIUAJYO TOTAJTSIN?

Ijkuak Jesús ouajlaka ipan tlaltikpaktli, okiteititi tlenon kichiuas ijkuak tlayekantoskia ipan iTekiuajyo toTajtsin. Yejua okinpajti akin kualouayaj (Mateo 4:23). Miyekej okintlakualti (Marcos 6:35-44). Niman okiteititi ika kipiya kojtilistli pampa hasta okinauati ajakatl (Marcos 4:37-41).

Melak tepaleui ika Jesús okinmachti tlaltikpakchanejkej kenon nemiskej ika inyojlo niman kenon kualtsin nouikaskej imiuan oksekimej. Akin yolyemankej niman kichiuaj tlen otemachti Jesús, kiyektlalijtokej innemilis. Yejuin kinpaleuis manemikan ika inyojlo ipan yejon tekiuajyotl. Xnemi nion se tlamachtijketl akin ijkon matepaleui ken Jesús. Uelis tikitas seki tlen otemachti ipan Sermón del Monte, yejuin uelis tiknextis ipan Mateo tlaxeloltin 5 hasta 7. Timitsyolchikauaj xpoua. Maski xouijtika ken otemachti, melak mitstlanemililtis niman ajsis ipan moyojlo.

¿KENON UELIS MITSPALEUIS ITEKIUAJYO TOTAJTSIN?

Tla tiknekij tinemiskej kampa tlayekanas iTekiuajyo toTajtsin, kachtopa noneki kuajli tikixmatiskej toTajtsin. Ipan se teoyotl, Jesús okijto: “In nemilistli yejuan para nochipa se kiselia ijkuak mitsixmati tejua yejuan san moselti melauak tiDios, niman nejua niJesuCristo yejuan otinechajtitlan” (Juan 17:3).

Melak techpaleuiya ijkuak tikixmatij toTajtsin. Matikitakan tleka ijkon tikijtouaj. Kachtopa, techpaleuiya matitlaneltokakan itech toTajtsin, niman ipampa yejon, kuajli tikasikamatij ika iTekiuajyo yemelak onka niman ika sa achijtsin poliui ika tlayekanas (Hebreos 11:1). Ika ome, kichiua más matiktlasojtlakan toTajtsin niman noijki oksekimej. Ijkuak tiktlasojtlaj toTajtsin, kuakon, ika toyojlo tiktlakamatij. Niman ijkuak tikintlasojtlaj oksekimej, tikchiuaj tlen Jesús okijtoka: “Xkinchiuilikan tlen kuajli oksekimej ijkon ken nemejuamej nenkinekiskiaj yejuamej ma mechchiuilikan” (Lucas 6:31).

Ijkon ken se tajtli kintlasojtla ikoneuan, toTajtsin akin otexchijchiuj noijki melak techtlasojtla. Yejua kineki kuajli matinemikan niman kineki matikpiyakan “melauak nemilistli” (1 Timoteo 6:19). Amantsin xtikpiyaj yejon nemilistli. Miyekej tlaltikpakchanejkej melak tlajyouiyaj. Matikitakan san seki tlen kualtsin kichiuas iTekiuajyo toTajtsin. Yejuin mitspaleuis xkita kenon tinemiskej ijkuak tikpiyaskej “melauak nemilistli”.

IJKIN YES “MELAUAK NEMILISTLI”

“Ipan yejon tonaltin [ijkuak tlayekanas Jesús] nomiyekiliskej akin yolmelaujkej, niman ijkuak xok onias metstli, ipan yejon tonajli xok onias yolseuilistli. Yejua tlayekanas [...] hasta kampa ontlami tlaltikpaktli” (Salmo 72:7, 8, 13, 14, TNM).
ToTajtsin “yokichiu para nochiuiyan ipan in tlaltikpaktli ma kintelti on guerras, yokimpojpostek on arcos, yokimpojpostek on lanzas” (Salmo 46:9).
“Onias miyek trigo ipan nochi tlaltikpaktli; inkuatipan tepemej melak tlatlakis” (Salmo 72:16, TNM).
“Kinchijchiuaskej kaltin niman ompa chantiskej, niman kitokaskej uvas niman kikuaskej itlakilyo. Xsan kinchijchiuaskej niman okse ompa chantis, xsan tokaskej niman oksekimej kikuaskej. [...] Tlen kichiuaskej ika imauan notlapejpenijkauan melak kinyolpaktis” (Isaías 65:21, 22).
“Aman Dios chanti intsajlan on tlakamej. [...] Dios kimpopouilis nochi iminixayo, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok” (Apocalipsis 21:3, 4).

Miyekej tlaltikpakchanejkej melak pakij ipan xochitlalpan — ITekiuajyo toTajtsin kichiuas matinemikan ika toyojlo niman maka keman matechpolo tlen tijkuaskej.