Iuan mofamilia niman moamigos

XTLANEMILI INTECH OKSEKIMEJ

TLEN BIBLIA TECHMACHTIA: “Maka xchiuakan on tlen kuajli san para nemejuamej, yej no xkinchiuilikan oksekimej on tlen kuajli” (Filipenses 2:4).

TLEN KIJTOSNEKI. Tla tejuamej tiknekij kuajli touikaskej imiuan oksekimej, noneki tiknektoskej tiktemakaskej tlen tikpiyaj niman maka san tikchiatoskej itlaj matechmakakan. Ijkuak san totech titlanemiliaj, kichiua maka kuajli matouikakan imiuan oksekimej. Xtlanemili itech yakaj akin yononamikti niman san itech tlanemilia, yejon uelis kichiuas ika makikajkayaua ixnamik. Niman yakaj akin noueyimati ipampa tlen kipiya noso ipampa tlen kimati, kinpolos iamigos. Ijkon ken kijtoua libro El camino del carácter, xtlaj ika mitspaleuis tla san motech titlanemilia.

TLEN UELIS TIKCHIUAS

• Xkinpaleui oksekimej. Se kuajli amigo yejua akin uelis itech titlaneltokas niman nochipa kinekis mitspaleuis. Seki ixtlamatkej yokitakej ika akin tlanemiliaj intech oksekimej, xnajmanaj niman más notlasojkaitaj.

• Xyejyeko xteasikamati. Titeasikamatis kijtosneki tikmachilis tlen yakaj okse kimachilia. Tla tejua titeasikamati, xtitenotsas ika tlajtoltin tlen teyolkokouaj niman xtikamanalos ika tlen tikmati teyolkokos.

  Tla titeasikamatij, noijki uelis techpaleuis matiteijyouikan. Ika yejon, tla titeasikamati mitspaleuis maka xtechikoita niman xkinpiya miyekej amigos akin sesejneka ualeuaj noso tlajtouaj.

• Xyejyeko xnemi imiuan oksekimej. Uelis tikimixmatiskej oksekimej tla tikxelouaj totiempo niman ijkon imiuan tinemiskej. San ika, tla tiknekij tikinpiyaskej kuajli toamigos, noneki matitlajtlajtokan itech tlen yejuamej kuelitaj. Ika yejon, kuajli xkinkaki moamigos niman xkita kenon tikinpaleuis itech intlaueluan. Seki ixtlamatkej yokitakej ika “akin san sekan tlajtlatouaj itech tlen inpan nochiua, más yolpakij”.

KUAJLI XKINTLAPEJPENI MOAMIGOS

TLEN BIBLIA TECHMACHTIA: “Yejuan iminuan nouika on yejuan xkuajli nouikaj, kijtlakouiliaj ikuajli nemilis” (1 Corintios 15:33).

TLEN KIJTOSNEKI. Toamigos uelis techpaleuiskej noso techijtlakoskej. Noijki ijkon yokitakej ixtlamatkej akin kitaj kenon toyekanaj. Yejuamej kijtouaj ika akin uejkauij nemij imiuan akin pokij noso akin kinekij kikauaskej imixnamik, sakin noijki ijkon uelis kichiuaskej.

TLEN UELIS TIKCHIUAS. Xyejyeko xmosentlali imiuan akin kuajli noyekanaj niman kichiuaj tlen kuajli. Tejua uelis tikintejtemos akin kuajli kinemiliaj tlenon kichiuaskej, tetlakaitaj, kuelitaj kitemakaskej tlen kipiyaj niman kuajli inyojlo.

OKSEKI TLEN BIBLIA TECHMACHTIA

MAKA MATIKIJTOKAN TLEN TEYOLKOKO

“On tlen se kijtoua yejuan xachtoj kinemilia, ueli tekokoua ken itlaj cuchillo” (PROVERBIOS 12:18).

XTEMAKA TLEN TIKPIYA

“Yejuan kuelita tepaleuis kiselis tlen kuajli” (PROVERBIOS 11:25).

MATIKTECHIUILIKAN TLEN TIKNEKIJ MATEXCHIUILIKAN

“Xkinchiuilikan oksekimej on tlajtlamach tlen nemejuamej nenkinekiskiaj ma mechchiuilikan” (MATEO 7:12).