Xteasikamati
Tlen kichiua matitechikoitakan
Tla san tikitstokej ika oksekimej xijkon kichiuaj ken tejuamej, uelis tiknemiliskej ika xkuajli tlen kichiuaj. Hasta ueliskia tiknemiliskej ika tejuamej más tiuejueyixtokej. Tla ijkon titlanemiliaj xuelis titeasikamatiskej niman titechikoitstoskiaj.
Tlen kijtoua Biblia
“Xpakikan inuan on yejuan pakij, niman xchokakan inuan on yejuan chokaj” (ROMANOS 12:15).
¿Tlenon kijtosneki? Yejuin kijtosneki ika noneki tikteititiskej ika titeasikamatij. Tla tiknekij tikchiuaskej yejuin, noneki tikyejyekoskej tikmachiliskej tlen oksekimej kimachiliaj.
Kenon techpaleuis tla titeasikamatij
Ijkuak titeasikamatij tikitaj ika oksekimej noijki tlanemiliaj niman kichiuaj ken tejuamej. Niman noijki tikitaj ika maski titlatlamantikej tinochimej tikniujtin. Kuakon, tla tikasikamatij ika oksekimej noijkomej ken tejuamej xtikinchikoitaskej.
Tla titeasikamatij noijki techpaleuis matikintlakaitakan oksekimej. Anne-Marie akin chanti Senegal, kinchikoitaya seki grupos akin miyekej kimitayaj ika xuejueyixtoyaj. Yejua techijlia kenon okipaleui ijkuak opeuj teasikamati: “Ijkuak onikitak kenon tlajyouiayaj, opeuj nitlanemilia kenon ninomachiliskia tla ninemiskia ipan yejon grupo. Onikitak ika yejuamej sa noijkomej katka ken nejua niman ika xnonekiya ninomachilis ika más niueyixtoya”. Tla tikasikamatij ika oksekimej noijki kixnamikij tlen ouijtika, xok tikintejteneuaskej niman tikimasikamatiskej.
Tlen uelis tikchiuas
Tla tikchikoita se grupo, xkita ika san noijki kichiuaj ken tejua. San xkonnemili, ¿kenon nomachiliaj ijkuak kichiuaj yejuin?
Tla titeasikamatij, tikitaskej ika tinochimej tikniujtin.
Ijkuak tlakuaj imiuan inchanejkauan.
Ijkuak chikauak yotekitkej.
Ijkuak nemij imiuan iminamigos.
Ijkuak tlauelkakij.
Aman xyejyeko xkimasikamati. Xmotlajtolti:
¿Tlenon nikchiuaskia tla yakaj nechijlia ika xtlaj ika nitepaleui?
¿Kenon ninomachiliskia tla yakaj nexchikoitaskia maski xnechixmati?
Tla ninemiskia ipan yejon grupo, ¿kenon ninomachiliskia tla xkuajli nechnotsaskiaj niman tla nexchiuiliskiaj tlen xkuajli?