KENON XOK SAJNOYE TIAJMANKAMIKIS
¿Tlenon kijtosneki tiajmankamikis?
Totlalnakayo ajmankamiki ijkuak kixnamiki itlaj tlen ouijtika. Totsontekon kipiya miyek hormonas, tlen kichiuaj totoka matejtekuini toyoltsin, totoka manotlalo toyesyo ipan totlalnakayo, totoka noso maka kuajli matitijyotikan niman kichiuaj makojtia totlalnakayo. Maski tejuamej xtikmatij tlenon panotika, totlalnakayo ikimati tlenon kichiuas. Ijkuak xok tiajmankamikij, totlalnakayo oksejpa kuajli nomachilia.
TLA TIAJMANKAMIKI, UELIS MITSPALEUIS NOSO MITSIJTLAKOS
Tiajmankamikis kipaleuiya totlalnakayo, pampa techpaleuiya matikixnamikikan itlaj. Nochi uajpeua ipan totsontekon. Tla tiajmankamikij ken kinamiki, techpaleuiya matikmatikan tlenon tikchiuaskej. Noijki uelis techpaleuis tikchiuaskej tlen yotikijtokej, ken ijkuak tikchiuaj se examen, ijkuak tikontejtemouaj tekitl noso ijkuak tauiltiaj.
San ika, tla nochipa tiajmankamikij, uelis kijtlakos totlalnakayo niman totlamachilis. Yejuin nesis ipan tlen tikchiuaj noso itech kenon touikaj imiuan oksekimej. Tla yakaj sajnoye ajmankamiki, uelis tlauanis noso kikuis drogas, noso kichiuas itlaj tlen xkipaleuis. Hasta uelis melak najmanas, kimachilis melak yosiauj noso kinemilis nomiktis.
Maski xsan noijki techijtlakoua, tla sajnoye tiajmankamikij uelis kichiuas melak matikualokan niman uelis kijtlakos nochi totlalnakayo.