¿Tejua titechikoitani?
Ijkuak yakaj techikoita kentla kipiyaskia se kokolistli tlen teijtlakoua niman kanaj nion xkimati ika yokimaujkej.
Yakaj uelis kinchikoitas oksekimej tla oksekan ualeuaj, tla sejneka tlachiaj, tla okse tlajtojli tlajtouaj, tla okse religión kipiyaj, tla tlakatl noso siuatl noso tla kipiya noso xkipiya tomintsin. Nemij akin xkuajli kimitaj oksekimej san pampa kitaj ika xonomachtijkej, ika kualoj, ika ueuentsitsintin noso melak kokonej, noso ipampa ken tlachiaj. San ika, kinemiliaj ika yejuamej xtechikoitaj.
¿Tiknemilia ika yomitsmaujkej niman aman noijki titechikoita? Nimantsin tikitaj ijkuak oksekimej techikoitaj, san ika, ouijtika tikitaj tla tejuamej noijki titechikoitaj. Niman maski san achijtsin, tinochimej titechikoitanij. Ixtlamatki David Williams kijtoua ika ijkuak tiknemiliaj tlen xkuajli itech se grupo niman sakin tonextiaj iuan yakaj akin teuan ipan yejon grupo, xkuajli tiknotsaskej, maski nion xtikitaskej tla ijkon tikchiujtokej.
Matikteneuakan se tlakatsintli itoka Yovitsa akin chanti Europa. Ompa noijki chantij sekimej akin melak kinchikoitaj. Yejua okijto: “Niknemiliaya ika yejuamej xkuajkualtin katkaj. Niman sa no nejua niknoijliaya: ‘Nejua xnikinchikoita, pampa tlen niknemilia intech, yemelak’”.
Gobiernos yokinchijchiujkej tlanauatiltin kampa kijtouaj ika maka matechikoitakan. San ika, xuelij kichiuaj maka sa matechikoitalo. ¿Tleka? Pampa yejon tlanauatiltin san kipatlaj tlen kichiuaj tlaltikpakchanejkej niman xkipatlaj tlen kinemiliaj niman tlen kimachiliaj. San ika, ijkuak yakaj peua techikoita, peua kinemilia niman kimachilia ipan iyojlo. Kuakon, ¿yejon kijtosneki ika nochipa nochikoitalos? ¿Onias itlaj tlen uelis kichiuas maka sa matechikoitalo?
Ipan okseki tlamachtiltin tikimitaskej makuijli textos ipan Biblia tlen miyekej yokinpaleui niman ijkon maka sa matechikoitakan.