¿Yotikitak tla yemelak tlen tikneltoka?
“Nochi universo san ijkon onesiko” (Stephen Hawking niman Leonard Mlodinow: El gran diseño [trad. David Jou i Mirabent], 2010).
“Dios okichijchiu on cielo, on tlaltikpaktli niman nochi tlen onkaj” (Biblia, Génesis 1:1).
¿ToTajtsin okichijchiuj nochi noso san ijkon onesiko? Xsan noijki tlen kijtoua Biblia niman tlen kijtouaj tlakamej akin yotikinteneujkej. Sekimej kinemiliaj ika toTajtsin otexchijchiuj niman oksekimej kinemiliaj ika san ijkon otiuajnemikoj. Nemij akin kineltokaj tlen kijtouaj seki libros niman tlen nesi ipan televisión. Niman oksekimej nion xkimatij tlenon kineltokaskej.
Kanaj ipan escuela omitsmachtijkej ika universo san ijkon onesiko niman ika xnemi yakaj akin otexchijchiuj. San ika ¿kuajli omitsijlijkej tleka ijkon kijtouaj? Niman kanaj noijki yotijkak ika sekimej kijtouaj ika yemelak nemi yakaj akin otexchijchiuj. San ika ¿kuajli omitsijlijkej tleka ijkon kijtouaj? ¿Noso omitsijlijkej ika san noneki tikneltokas?
Kanaj tejua yotimotlajtoltijka yejuin niman kanaj tiknemilia ika xuelis tikmatiskej tla yemelak nemi yakaj akin otexchijchiuj. Kanaj timotlajtoltia tla yemelak noneki tikmatiskej yejuin.
Ipan yejuin revista tikitas tlen yokinpaleui oksekimej makineltokakan ika nemi yakaj akin otexchijchiuj. Sakin tikitas tleka noneki tikmatiskej kenijki otiuajnemikoj.