Tlen Biblia techijlia
“Ijkon onochiu ijkuak toTEKO Dios okichijchiu on cielo niman in tlaltikpaktli” (Génesis 2:4). Nikan Biblia techijlia kenon onochijchiuj yejuin tlaltikpaktli. ¿Notlajtolnamiki Biblia niman ciencia? Matikitakan.
Kachtopa okichijchiujkej tlaltikpaktli niman cielo.
¿Kemanon onochijchiuj universo?
Génesis 1:1 kijtoua: “Ijkuak nochi kemach opeu onkaj, Dios okichijchiu on cielo, niman tlaltikpaktli”.
Kanaj itlajkotian siglo veinte, miyekej científicos kineltokayaj ika universo xkipiaya kemanon onochijchiuj. San ika, aman ika más yonomachtijkej, miyekej científicos kijtouaj ika universo kipiya kemanon ouajpeuj.
¿Kenon katka yejuin tlaltikpaktli?
Génesis 1:2, 9 kijtoua ika “ijkuakon, on tlaltikpaktli xnesiya ken onkatka. Nochi tentikatka ikan atl”.
Yejuin notlajtolnamiki ika tlen científicos yokitakej. Biólogo Patrick Shih kijtoua ika yeuejkaui “ipan yejuin tlaltikpaktli xtlakualkan katka niman xueliskia timijyotis pampa xonkatka oxígeno”. Revista Astronomy kijtoua ika “kemach yonoitak ika yeuejkaui yejuin tlaltikpaktli tentoya ika atl niman xmás onkatka tlaluaktli”.
¿Kenon onopatlatiaj atmósfera?
Génesis 1:3-5 techasikamachiltia ika tlauijli san kitlauiluiaya atmósfera, san ika, xkitlauiluiaya tlajli. Melak ouejkauj para onesiko tonajli niman metstli (Génesis 1:14-18).
Biblia xkijtoua ika nochi onochijchiuj ipan chikuasen tonajli tlen san kipiya 24 horas
Centro Smithsonian de Investigaciones Ambientales kijtoua ika yeuejkaui, atmósfera san achijtsin kikauiliaya tonaltsintli makitlauilui tlajli. Pampa ajakatl kipiaya metano, yejuin kichiuaya ika nochiuiyan maayaui. Sakin, “ayaujtli opopoliuj niman aman cielo kuajli nesiya”.
¿Kenon opeuj nochi tlen yoltika?
Génesis 1:20-27 kijtoua ika kachtopa opeuj nemij michimej, totomej, yolkamej akin nemij ipan tlajli niman sakin tlaltikpakchanejkej. ¿Tlenon kijtouaj científicos? Yejuamej kineltokaj ika kachtopa onenkej michimej sakin oksekimej yolkamej niman sakin tlaltikpakchanejkej.
Biblia xkijtoua tla yolkamej xuelis kipatlaskej ken tlachijchiujtin
Tlen Biblia xtechijlia
Sekimej kijtouaj ika Biblia xnotlajtolnamiki ika tlen kijtouaj científicos. Kemantika ijkon kijtouaj pampa xkasikamatij tlen Biblia kijtoua.
Biblia xkijtoua ika universo noso tlaltikpaktli san kipiya 6,000 xiuitl. Biblia kijtoua ika universo niman tlaltikpaktli onochijchiujkej “ijkuak nochi kemach opeu onkaj” (Génesis 1:1). Biblia xkijtoua kemanon onochiuj yejon.
Biblia xkijtoua ika nochi onochijchiuj ipan chikuasen tonajli tlen san kipiya 24 horas. Ijkuak Biblia kijtoua tonajli, xkijtosneki se tonajli tlen kipiya 24 horas. Uelis kijtosnekis miyek tonaltin, metstin noso xiujtin. Biblia kijtoua ika nochi onochijchiuj ijkuak Jehováa “okichijchiu on cielo niman in tlaltikpaktli” (Génesis 2:4). Ipan tlen kijtoua Génesis capítulo 1, ompa kalaki yejon chikuasen tonajli ijkuak toTajtsin okichijchiuj tlaltikpaktli niman nochi tlen yoltika. Kuakon, kanaj nochi yejon chikuasen tonajli ouejkauj miyek tiempo.
Biblia xkijtoua tla yolkamej xuelis kipatlaskej ken tlachijchiujtin Biblia kijtoua ika toTajtsin okichijchiuj “cada se ika itlakatilis” (Génesis 1:24, 25). Ijkuak Biblia kiteneua “cada se ika itlakatilis” kijtosneki ika nemij melak miyekej yolkamej. Yejuin kijtosneki ika ijkuak nonelouaj sekimej yolkamej uelis nopatlas ken tlachiaj.
¿Ken tikita?
Biblia kijtoua kenon onochijchiuj universo, kenon katka tlaltikpaktli yeuejkaui niman kenon opeuj nochi tlen yoltika. Tla Biblia techijlia nochi yejuin, noijki uelis techijlis akinon okichijchiuj. Encyclopædia Britannica, kijtoua ika maski Biblia kijtoua ika toTajtsin otexchijchiuj, miyekpa notlajtolnamiki ika tlen científicos kijtouaj.b
a Biblia kijtoua ika toTajtsin itoka Jehová.
b Encyclopædia Britannica xtemachtia tla toTajtsin otexchijchiuj.