Historia 4

Tleka okinkixtijkej kampa chantiyaj

XKITA tlen panotika. Kinkixtijtokej Adán niman Eva itech xochitlalpan Edén. ¿Tikmatstika tleka?

Pampa okichiujkej itlaj tlen melak xkuajli. Niman aman Jehová kinkauilijtika matlajyouikan. ¿Tikmatstika tlen okichiujkej Adán niman Eva?

Okichiujkej tlen toTajtsin okimijli maka makichiuakan. ToTajtsin okimijli ika, intlakilyo kojtin tlen onkatkaj ipan yejuin xochitlalpan ueliskiaj kikuaskiaj. San se kojtli itlakilyo okimijli maka makikuakan; tla kikuaskiaj, mikiskiaj. Yejuin itlatki katka toTajtsin. Niman tikmatstokej ika xkuajli tla tikasij tlen xtotlatki, ¿xmelak? Kuakon, ¿tlenon opanok?

Se tonajli ijkuak san iselti nemiya Eva ipan xochitlalpan, se kouatl okinots. ¡San xnemili! Yejuin kouatl okijli Eva makikua itlakilyo kojtli tlen toTajtsin okimijli maka makikuakan. Jehová xokinchijchiuj kouamej matlajtokan. Ika yejon, nemiya okse akin kichiuaya matlajto yejuin kouatl. ¿Akinon katka?

Xyejua katka Adán. Yejuin yeskia akin Jehová okichijchiuj ijkuak xpeuaya tlachijchiua ipan tlaltikpaktli. Iluikaktekitkej katkaj akin xuelij tikimitaj. Se itech yejuin iluikaktekitkej melak onoueyimat. Opeuj kinemilia noijki ijkon tlayekanas ken toTajtsin niman yejua makitlakamatikan, maka Jehová. Yejua okichiuj matlajto kouatl.

Yejuin iluikaktekitketl ouel okikajkayauj Eva. Ijkuak okijli ika yeskia kentla toTajtsin tla kikuaskia itlakilyo kojtli, Eva okineltokak. Kuakon okikua, niman Adán noijki okikua. Adán iuan Eva xokitlakamatkej toTajtsin, niman ika yejon okinkixtijkej kampa kualtsin chantiyaj, itech xochitlalpan.

Ajsis tonajli ijkuak toTajtsin kichiuas nochi tlaltikpaktli kualtsin manochiua kentla xochitlalpan Edén. Sakin tikitaskej kenon uelis titlapaleuis ijkon manochiua. Aman matikitakan tlen inpan onochiuj Adán iuan Eva.

Génesis 2:16, 17; 3:1-13, 24; Apocalipsis 12:9.