Historia 13
Abrahán, akin iuan nouika toTajtsin
IPAN se ueyikalpan kampa ochantitoj tlaltikpakchanejkej ijkuak opanok Apachiuilistli itoka katka Ur. Miyekej kixmatiyaj Ur niman kipiaya kaltin kualtsitsintin. San ika, akin ompa chantiyaj kiueyichiuayaj tajtsitsintin. Noijki ipan Babel ijkon kichiuayaj. Akin chantiyaj ipan Ur niman Babel xijkon katkaj ken Noé iuan ikoneuj Sem, akin ok kitekichiuiliayaj Jehová.
Opanok 350 xiujtin ika apachiuilistli yopanoka niman Noé akin yolmelauak omik. San opanok ome xiuitl niman otlakatiko yejuin tlakatl akin tikita ipan yejuin tlaixkopinajli. Se tlakatl akin melak kitlasojtlaya toTajtsin. Itoka katka Abrahán. Nemiya iuan ichanejkauan ipan yejon ueyikalpan Ur.
Se tonajli Jehová okijli Abrahán: ‘Xkisa itech ueyikalpan Ur iuan mochanejkauan, niman xuiya ipan país tlen nimitsititis’. ¿Okitlakamat toTajtsin niman okikaujteuj nochi tlen melak kuajli kipiaya ipan Ur? Kema. Niman pampa Abrahán nochipa kitlakamatiya toTajtsin, okixmatkej kentla akin iuan nouika toTajtsin.
San seki ichanejkauan Abrahán oyajkej iuan, ijkuak okiskej itech Ur. Itaj Taré iuan oyaj. Noijki isobrino Lot. Niman isiuauj Sara. Sakin oajsikej ipan se ueyikalpan tlen itoka Harán, niman Taré omik. Uejka nemiyaj itech Ur.
Sakin, Abrahán iuan ichanejkauan okiskej itech Harán niman oajsikej kampa itoka Canaán. Ompa Jehová okijto: ‘Yejuin tlajli nikinmakas mokoneuan’. Abrahán onokauj Canaán niman kampa chantiya san nokajkaltiaya.
ToTajtsin opeuj kipaleuiya Abrahán niman yejua okipix miyek borreguitos iuan oksekimej yolkamej niman melak miyekej itlakeualuan. San ika, yejua iuan Sara xkinpiayaj ikoneuan.
Ijkuak Abrahán kipiaya 99 xiujtin, Jehová okijli: ‘Nimitsijlia ika tejua titajtli yes itech melak miyekej tlaltikpakchanejkej’. San ika, ¿kenon ueliskia nochiuas yejuin, ijkuak Abrahán iuan Sara youeuentsintiakaj?
Génesis 11:27-32; 12:1-7; 17:1-8, 15-17; 18:9-19.