Historia 15

Isiuauj Lot oontlachix tlakuitlapan

LOT niman ichanejkauan chantiyaj Canaán iuan Abrahán. Se tonajli Abrahán okijli Lot: ‘Nikan xonka miyek tlaltin kampa uelis nemiskej toyolkauan. Nimitstlajtlanilia matoxelokan. Tla tejua nikan tias nejua oksekan nias’.

Lot okitak yejon tlajli. Niman okitak ueyikan ipan yejon país onkatka atl niman miyek xiujtli kampa tlakuajkuaskej iyolkauan. Katka iDistrito Jordán. Kuakon Lot okinuikak ichanejkauan ompa. Ipan ueyikalpan Sodoma okichijchiujkej inkal.

Akin chantiyaj Sodoma melak xkuakualtin katkaj. Pampa Lot yolkuajli, melak kiyolkokouaya tlen panouaya. ToTajtsin noijki melak kikualaniaya. Kuakon, toTajtsin okintitlan ome iluikaktekitkej tlen kijliskiaj Lot ika kixoxotoniskia Sodoma niman ueyikalpan Gomorra tlen nisiu nokauaya, pampa akin ompa chantiyaj melak xkuakualtin katkaj.

Lot okijlikej iluikaktekitkej: ‘¡Xmotlasiuiti! ¡Xkinuika mosiuauj iuan omemej mochpochuan niman xkisa!’ Pampa iluikaktekitkej kitayaj ika Lot iuan ichanejkauan uejkauiyaj, okinmasikej ipan imauan niman okinkixtijkej itech yejuin ueyikalpan. Kuakon se iluikaktekitketl okimijli: ‘¡Xcholokan! Maka xontlachiakan tlakuitlapan. Xmotlalokan, xiakan ipan tepemej, niman ijkon xnenmikiskej’.

Lot iuan ichpochuan otetlakamatkej niman okiskej itech Sodoma. Nion achijtsin xonoteltijkej, niman xoontlachixkej tlakuitlapan. San ika, isiuauj Lot xotetlakamat. Ijkuak yokitlalkauijkaj Sodoma, yejua onotelti niman oontlachix tlakuitlapan. Kuakon onokuep istatl. ¿Ueli tikita ipan tlaixkopinajli?

Itech yejuin tiuelij ika toTajtsin kinmakixtia akin kitlakamatij, niman akin xkitlamatij mikij.

Génesis 13:5-13; 18:20-33; 19:1-29; Lucas 17:28-32; 2 Pedro 2:6-8.