ToTajtsin notlajtolkaua iuan Abrahán

YOPANOKEJ kanaj trescientos cincuenta xiujtin ijkuak oapachiuilok. Ipan ueyikalpan Ur kampa onkatka miyek tomin, kampa onka país Irak, chanti Abrahán. Yejua se tlakatl akin kineltokaya toTajtsin, san ika kitlatlataskej tla yemelak itech tlaneltoka. Matikitakan tlenon opanok.

Jehová okijli makisa kampa chantiya niman mauiya itech okse país: Canaán. Xokpa okinemili, Abrahán otetlakamat. Okis iuan isiuauj Sara, isobrino Lot niman nochi akin iuan chantiyaj. Ijkuak oajsik Canaán, xompa onochanti pampa nejkuanijtinemiya niman san nokajkaltiaya. Jehová iuan onotlajtolkauj Abrahán: okijli ika nochi familias ipan tlaltikpaktli noteochiuaskiaj ipampa, ika ikoneuan melak nomiyekiliskiaj niman kinoyaxkatiskiaj Canaán.

Abrahán niman Lot okinpixkej melak miyekej borregos niman uakaxtin. Abrahán yolkuajli katka niman okikauili isobrino makitlapejpeni kanon kuelitaskia matlakuajkuakan iyolkauan. Lot okitlapejpeni kampa onkatka atentli Jordán, kampa melak tlatlakiya, niman onochanti nisiu Sodoma. San ika, akin chantiyaj Sodoma melak tsokuiltik katka imintlanemilil niman ika intlajtlakoluan kiyolkokouayaj Jehová.

Sakin ijkuak Abrahán onoxelo itech Lot, Jehová okijli ika nomiyekiliskiaj ikoneuan ijkon ken miyek sitlalimej ipan iluikak. Abrahán kineltokaya tlen okijto Jehová, san ika isiuauj Sara xueliya kimpiaya ikoneuan. Kuakon, ijkuak kipiaya 99 xiujtin niman Sara kanaj 90, toTajtsin okijli ika kipiyaskiaj inkoneuj. Niman ijkon opanok: Sara okipix ikonetsin akin okitokayotijkej Isaac. Niman maski Abrahán okipix oksekimej ikoneuan, yejon Temakixtijketl tlen onoijto ipan Edén, uajnemiskia itech ichanejkauan Isaac.

Niman Lot iuan ichanejkauan ok chantitoyaj Sodoma. San ika, yejua xokichiuj ken tlaltikpakchanejkej akin kipiayaj iminemilis tsokuiltik, pampa yejua se kuajli tlakatl. Ika yejon, toTajtsin okinemili kipopolos Sodoma, kachtopa okimintitlan iiluikaktekitkauan makijlitij Lot tlen nochiuaskia. Yejuamej okijlikej macholo iuan ichanejkauan niman nion se maka maontlachia tlakuitlapan. Kuakon, toTajtsin okichiuj mauetsiki tlitl niman azufre tlen oualeuj iluikak, niman ijkon okimpopolo akin chantiyaj Sodoma niman noijki ueyikalpan Gomorra tlen nisiu onkatka. Lot niman iichpokauan xomijkej. San ika, isiuauj oontlachix tlakuitlapan, kanaj pampa kiyolkokouaya tlen kuajkaujteujtoya. Pampa xotetlakamat, omik.

(Onokixti itech Génesis 11:10–19:38.)