Historia 50

Omemej siuamej yolchikaujkej

AMAN ijkuak ipan tlauejli nokalaktiaj israelitas, kiueyikatsajtsiliaj Jehová. Niman toTajtsin kinkaki, ika yejon, kintitlanilia tlayekankej yolchikaujkej akin kinpaleuiyaj. Biblia kintokayotia jueces. Josué yejua akin okitlalijkej kentla kachtopa juez niman sakin onenkej oksekimej jueces kentla: Otniel, Ehúd niman Samgar. Omemej akin okinpaleuijkej israelitas siuamej katkaj niman yejuin intoka katka Débora iuan Jael.

Débora katka se siuatl teotlajtoketl. Jehová kijlia tlenon panos ika tlayekapan, niman yejua kinkakistilia israelitas nochi tlen Jehová kijlia. Débora noijki se juez. Notlalia itsintlan se palmera kampa tepeyoj niman israelitas uajlauej itech, niman ijkon makinyektlalili intlaueluan.

Amantsin ipan Canaán tekiuajtitika Jabín. Kipiya 900 carros tlen kintekitiltia ipan guerra. Pampa melak miyekej isoldados, Jabín kichiua ika miyekej israelitas manokuepakan itlakeualuan. Akin kiyekana isoldados Jabín, itoka Sísara.

Se tonajli Débora kinotsa juez Barac, niman kijlia: ‘Jehová yokijto: “Xkinmanati majtlaktli mil tlakamej niman xkinuika ipan tepetl Tabor. Ompa nimitsuikilis Sísara niman nejua nikchiuas xtlani yejua iuan isoldados”’.

Barac kijlia Débora: ‘Nias tla tejua nouan tias’. Débora yauj, san ika, kijlia Barac: ‘Xmitstlakaitaskej ika titetlanis, pampa Jehová kichiuas se siuatl makimikti Sísara’. Niman ijkon panoua.

Barac yauj ipan tepetl Tabor niman ijkon iuan nonamiki isoldados Sísara. Nimantsin, Jehová kichiua maamimikikan miyekej akin kixnamikiskiaj Barac. Sísara uajtemoua ipan icarro niman choloua.

Xuejkaujtipan Sísara ajsi ichan Jael. Yejua kijlia makalaki, niman kimaka achijtsin leche. Yejuin kikochtlajkali Sísara. Kuakon Jael kontilana se tlakotl yekapitstik niman kikuatsopinia. ¡Ijkuak Barac uajlauj, Jael kititia kampa miktok Sísara! Tlen Débora okijto onochiuj.

Noijki kimiktiaj tekiuaj Jabín; niman san seki xiuitl israelitas nemij ika inyojlo.

Jueces 2:14-22; 4:1-24; 5:1-31.