Se yenkuik tlayekanketl niman omemej siuamej yolchikaujkej

Josué omik ijkuak kipiaya 110 xiuitl, miyek xiuitl okiyekan ikalpan Jehová. Ijkuak yejua nemiya, israelitas okiueyichiujkej Jehová. San ika, ijkuak omik Josué, opeujkej kinueyichiuaj tajtsitsintin ijkon ken cananeos. Pampa israelitas xok okitlakamatkej, Jehová okikauili ika se tekiuaj cananeo itoka katka Jabín makintlajyouilti. Kalpan okitlajtlanili Jehová makipaleui. Kuakon Jehová okinmakak se yenkuik tlayekanketl, Barac. Yejua kipaleuiskia kalpan manokuepa itech Jehová.

Débora, akin teotlajtoketl katka, okiteijli makinotsatij Barac. Yejua okijli tlen Jehová okijto: “Xkinuika 10,000 tlakamej niman xkimixnamikitij isoldados Jabín ipan atentli Cisón. Ompa tiktlanis Sísara akin tlayekana itech isoldados Jabín”. Barac okijli Débora: “Nias san tla nouan tiauj”. Yejua okinankili: “Mouan nias. San ika, xmatsto ika xtejua tikmiktis Sísara. Jehová yokijto ika se siuatl kimiktis”.

Débora otlejkok iuan Barac niman soldados ipan tepetl Tabor, ijkon onoyektlalijkej pampa tlaixnamikiskiaj. Ijkuak Sísara okimat yejuin, okinsentlali ipan valle icarros tlen ika tlaixnamiki niman isoldados. Débora okijli Barac: “Aman ipan yejuin tonajli Jehová kichiuas xtetlani”. Barac niman 10,000 soldados otemokej itech tepetl niman okimixnamikitoj isoldados Sísara.

Sakin, Jehová okichiuj makisa atentli Cisón niman icarros Sísara tlen ika tlaixnamiki osokipolajkej. Sísara otemok ipan icarro niman onotlalo. Barac niman isoldados okintlankej isoldados Sísara, san ika Sísara onotlalojteuj oniyanato kampa chantiya se siuatl itoka katka Jael. Siuatl okimakak makoni leche niman okitlapacho. Yejon soldado okoch pampa melak siaujtoya. Kuakon Jael yoliktsin okinisiui niman ika se tlakotl yekapitstik okikuatsopini, Sísara omik.

Barac okitejtemoto Sísara. Jael ouajkis kampa chantiya niman okijli: “Xkalaki. Nimitsititis tlakatl akin tiktejtemoua”. Barac okalak niman okitak ika Sísara yomijka, ompa tlajkaltoya. Barac niman Débora okiueyichiujkej Jehová ika se tlakuikajli pampa okinpaleui israelitas makintlanikan intlauelikniuan. Israelitas onenkej ika yolseuilistli 40 xiuitl.