Historia 53

Tlen Jefté okijto kichiuas

¿KEMANTIKA itlaj otikijto tlen sakin xueliya tikchiuaya? Ijkon ipan onochiuj yejuin tlakatl tlen nesi ipan tlaixkopinajli, niman ika yejon noyolkokoua. Itoka Jefté, yejua se juez ipan Israel.

Jefté nemi ijkuak israelitas xok kiueyichiuayaj Jehová. Oksejpa kichiuaj tlen xkuajli. Kuakon Jehová kinkauilia amonitas makintlajyouiltikan israelitas. Israelitas kinotsaj Jehová: ‘Yotitlajtlakojkej motech. ¡Xtechmakixti!’

Tlaltikpakchanejkej noyolkokouaj itech tlen xkuajli kichiuaj. Ijkon kiteititiaj ijkuak oksejpa kiueyichiuaj Jehová. Ika yejon, Jehová oksejpa kinpaleuiya.

Israelitas kitlapejpeniaj Jefté niman ijkon makimixnamiki amonitas. Jefté kineki Jehová makipaleui ijkuak tlaixnamikis. Ika yejon, kijlia Jehová: ‘Tla tejua tinechkauilia manitetlani, nimitsmakas akin kachtopa nechuajnamikis, ijkuak nejua ninokuepas tla yonitetlan’.

Jehová kikaki tlen Jefté kijlia, kuakon kipaleuiya matetlani. Aman ijkuak Jefté nokuepa ichan, ¿tikmatstika akinon ouajkis okinamikiko? Ichpoch, isentekonetsin. ‘¡Ay, nokoneuj!’, choka Jefté. ‘¡Melak ninoyolkokoua mopampa! Nejua onikijli toTajtsin Jehová tlen nikchiuaskia, niman aman kipiya ika nikchiuas tlen onikijli.’

Ijkuak ichpoch Jefté kimati tlen itaj yokijtoka kichiuas, kachtopa noijki noyolkokoua, pampa kinkaujteuas itaj niman akin imiuan nouika. Kech uejkauis nemis, kitekichiuilis Jehová ipan itabernáculo, tlen onka Siló. Kuakon kijlia itaj: ‘Tlen otikijli Jehová tikchiuas, noneki xchiua’.

Kuakon ichpoch Jefté yauj Siló, niman ompa nokaua kitekichiuilia Jehová ipan itabernáculo. Siuamej israelitas naui tonajli ipan nochi xiujtin kontlajpalouaj niman melak yolpakij san sekan. Miyekej kitlasojtlaj ichpoch Jefté, pampa melak kuajli kitekichiuilia, toTajtsin Jehová.

Jueces 10:​6-​18; 11:​1-​40.