Melak okiyolpakti itataj niman Jehová

¿Tikmatstika akinon yejuin siuakonetl akin nesi ipan yejuin tlaixkopinajli?... Yejua ichpokatsin se tlakatl akin itoka Jefté. Biblia xkijtoua kenon itoka katka, san ika, kema tikmatstokej ika melak okiyolpakti itataj noso itaj niman Jehová. Matikitakan tlenon okichiuj niman itataj, ¿kema?

Jefté katka se kuajli tlakatl niman nochipa kinojnotsaya ichpokatsin itech Jehová. Katka se tlakatl chikauak niman kuajli tlayekanaya. Ika yejon, israelitas okijlikej makinyekana ijkuak kimixnamikiskiaj akin kintlauelitaj.

Jefté okitlajtlanili Jehová makipaleui matetlani. Yejua okijli Jehová ika tla tetlani, kimakaskia akin kachtopa uajkisaskia ichan niman kuajnamikiskia ijkuak uajnokuepaskia. Yejuin chantiskia niman nochipa kitekichiuiliskia toTajtsin ipan tabernáculo. Tabernáculo katka se kajli kampa yayaj tlaltikpakchanejkej konueyichiuayaj toTajtsin. ¿Tikmatis akinon otetlan? Kema, otetlan Jefté. Ijkuak onokuep ichan, ¿akinon tiknemilia kachtopa ouajkis?...

¡Kema, ichpoch Jefté! Xkipiaya okse ikoneuj, san se ichpokatsin okipix. Niman aman kititlaniskia ipan tabernáculo ompa machantiti. Yejuin melak okiyolkoko. San ika, xkilnamiki ika itataj ijkon okijli Jehová kichiuas. ¿Tikmatis tlenon yejuin ichpochtli okijli itataj? Yejua okijli: “Tataj, tejua otikijli Jehová niman noneki ijkon tikchiuas”.

Ichpoch Jefté noijki onoyolkoko. ¿Tikmatis tleka? Pampa ijkuak nemiskia ipan tabernáculo xueliskia nonamiktiskia niman xueliskia kipiyaskia ikonetsitsinuan. San ika, melak kinekiya kichiuas tlen itataj okijto ipan iteoyouj niman kiyolpaktis Jehová. Ika iyojlo kinekiya kichiuas maski xueliskia nonamiktis nion xkipiyaskia ikonetsitsinuan. Kuakon, okis ichan niman nochipa okitekichiuili Jehová ipan tabernáculo.

¿Tiknemilia okiyolpakti yejuin ichpochtli itataj niman Jehová?... ¡Kema, okinyolpakti! Tejua noijki uelis ijkon tikchiuas ken ichpoch Jefté. Tla titetlakamati niman tiktlasojtla Jehová, yejua melak tikyolpaktis niman noijki tikinyolpaktis motajuan.