Historia 72
Totajtsin kipaleuiya Ezequías
¿TIKMATSTIKA tleka yejuin tlakatl kichiuilijtika teoyotl Jehová? Niman, ¿tleka yokintlali yejuin amatlajkuiloltin iyekapan itlaixpan Jehová? Yejuin tlakatl itoka Ezequías. Yejua tekiuajti itech ome uejueyimej familias israelitas, akin chantij ika tlatsintlan. Melak kipiyaj tlauejli. ¿Tleka?
Pampa soldados asirios yokinpopolojkej majtlaktli uejueyimej familias, akin chantij ika tlakpak. Jehová okikauili ijkon mapano pampa melak xkuakualtin katkaj. Niman aman soldados asirios youajlakej itech ome uejueyimej familias.
Akin tekiuajti ipan Asiria okontlajkuilouili tekiuaj Ezequías. Yejuin amatlajkuiloltin tlen tekiuaj Ezequías yokitlali ixpan toTajtsin. Kipinaujtiaj Jehová itech tlen ompa ijkuiliujtika, niman noijki kijliaj Ezequías ika xok itlaj uelis kichiuas. Ika yejon, Ezequías kichiua teoyotl: ‘Oh Jehová, xtechmakixti itech akin tekiuajti ipan Asiria. Kuakon nochimej países kimatiskej ika san tejua titoTajtsin’. ¿Kikakis Jehová?
Ezequías se kuajli tekiuaj. Xijkon ken tekiuajkej itech majtlaktli uejueyimej familias israelitas, nion ken itaj Acaz akin xkuajli otekiuajtik. Ezequías okitlakamat nochi itlanauatiluan Jehová. Ika yejon, ijkuak otlan kichiua teoyotl, teotlajtoketl Isaías kijlia tlen Jehová okijto: ‘Tekiuaj itech Asiria xkalakis ipan Jerusalén. Nion se soldado xkinisiuis. Nion se flecha xkontlajkaliliskej Jerusalén’.
Xkita tlaixkopinajli tlen nikan nesi. ¿Tikmatstika akinomej yejuin soldados akin yomijkej? Yejuamej asirios. Jehová okititlan iiluikaktekitkauj, niman san ipan se yeuajli, yejuin iluikaktekitketl okimikti 185 mil soldados asirios. Ika yejon, tekiuaj itech Asiria choloua.
Tekiuajyotl itech ome uejueyimej familias makisaj, niman nemij ika inyojlo, san ika, xouejkaujkej ijkon onenkej. Sakin, ijkuak Ezequías omik, ikoneuj itoka Manasés okitlalijkej kentla tekiuaj. Manasés niman ikoneuj Amón, akin okitekipatlak melak xkuajli otekiuajtikej. Kuakon tlaltikpaktli oten ika tlen xkuajli niman ika tlajyouilistli. Ijkuak itlapaleuijkauan tekiuaj Amón okimiktijkej, ikoneuj Josías okitlalijkej kentla tekiuaj itech ome uejueyimej familias israelitas.
2 Reyes 18:1-36; 19:1-37; 21:1-25.