Se iiluikaktekitkauj Jehová okimakixti Ezequías

Tekiuajyotl asirio okinoyaxkatijka majtlaktli uejueyimej familias ipan Israel. Aman Senaquerib, tekiuaj ipan Asiria, noijki kinekiya noyaxkatis ome uejueyimej familias ipan Judá. Opeuj noyaxkatia sesentetl iueyikalpanuan Judá. Niman Senaquerib melak kinekiya kinoyaxkatis Jerusalén. San ika, xkimatiya ika Jehová kitlajpiaya Jerusalén.

Ezequías, itekiuaj Judá, okimakak miyek tomin Senaquerib niman ijkon maka itlaj kichiuilis Jerusalén. Maski Senaquerib okiseli tomin, okintitlan akin tlaixnamikij makixnamikitij Jerusalén. Kalpan melak nomojtiaya pampa asirios nonisiuiayaj. Kuakon Ezequías okimijli: “Maka xmomojtikan. Asirios kojtikej, san ika, Jehová kichiuas matikpiyakan kojtilistli xijkon ken yejuamej”.

Senaquerib okititlan rabsaqué, akin tlajtoskia ipampa, niman kinpijpinaujtiskia chanejkej Jerusalén. Rabsaqué onokauj ikiyauak ueyikalpan niman otsajtsik: “Jehová xuelis mechpaleuis. Maka mamechkajkayaua Ezequías. Nion se tatajtsin xuelis mechmakixtis totech”.

Ezequías okitlajtolti Jehová tlenon nonekiya kichiuas. Jehová okinankili: “Maka mamitsmojti tlen kijtoua rabsaqué. Senaquerib xnoyaxkatis Jerusalén”. Sakin, Ezequías okiseli amatlajkuiloltin itech Senaquerib. Amatlajkuiloltin kijtouayaj: “Xmotemakakan. Jehová xuelis mechpaleuis”. Ezequías okichiuj teoyotl, okijto: “Jehová, timitstlajtlaniliaj, xtechmakixti intech, ijkon nochimej kimatiskej ika tejua titoTajtsin akin melauak”. Jehová okijli: “Tekiuaj ipan Asiria xkalakis Jerusalén. Nejua niktlajpiyas nokalpan”.

Senaquerib kinemiliaya nimantsin noyaxkatiskia Jerusalén. San ika, se yeuajli, Jehová okititlan iiluikaktekitkauj kampa onokajkaltijkaj soldados asirios akin nemiyaj ikiyauak ueyikalpan. ¡Iluikaktekitketl okinmikti 185,000 soldados! Ijkuak isoldados tekiuaj Senaquerib akin melak kojtikej katkaj omijkej, yejua onokuep ichan. Jehová okitlajpix Ezequías niman Jerusalén ijkon ken okijtoka kichiuas. Tla tinemiskia Jerusalén, ¿titlaneltokaskia itech Jehová?