Historia 85
Jesús tlakati kampa kintsakuaj yolkamej
¿TIKMATSTIKA akinon yejuin konetsintli? Kema, yejua Jesús. Kemach otlakatiko kampa kintsakuaj yolkamej. María kitekatika Jesús ipan se kuexomatl, kampa kintlaliliaj tlakuajli uakaxtin niman oksekimej yolkamej. San ika, ¿tleka María iuan José nemij nikan, kampa nemij yolkamej? Xtlakualtsinkan matlakati se konetsintli nikan, ¿xmelak?
Ka, xtlakualtsinkan. San ika, yejuamej nikan nemij pampa tlakatl akin tekiuajti ipan Roma, César Augusto, okitlali se tlanauatijli kampa kijtouaya ika nochimej mayakan kampa otlakatkaj niman manoijkuilotij. José nikan otlakat ipan ueyikalpan Belén. San ika, ijkuak yejua iuan María oyejkokej, xokinextijkej kanon noseuiskej. Ika yejon, onoseuijkej kampa nemiyaj yolkamej. ¡Niman ipan yejon tonajli María okitlakatili Jesús! Maski ijkon, konetsintli kuajli nemi, ken tikita nikan.
¿Ueli tikimita tlajpixkej akin okitakoj Jesús? Yejuamej nemiyaj ipan tepetl ika yeuajli ijkuak se tlauijli okintlauilui. ¡Se iluikaktekitketl katka! Tlajpixkej melak onomojtijkej. San ika, iluikaktekitketl okimijli yejuin: ‘¡Maka xmomojtikan! Nimechuajkuilia kuajli tlajtoltin. Ipan yejuin tonajli, ipan Belén, yotlakatiko toTeko Cristo. ¡Yejua akin kinpaleuis tlaltikpakchanejkej! Tejkuixtos ika tlakentli ipan se kuexomatl’. Nimantsin, miyekej iluikaktekitkej ouajlakej niman opeujkej kiueyichiuaj toTajtsin. Nimantsin yejuin tlajpixkej oyajkej okitejtemotoj Jesús, niman aman yokinextijkej.
¿Tikmatstika tleka tlamantik noso sejneka Jesús? ¿Tikmatstika akinon melauak yejua? Xkilnamiki ika ipan kachtopa historia itech yejuin amoxtli otitlajtokej itech iKoneuj toTajtsin. Yejua otekit iuan Jehová ijkuak okichijchiuj iluikamej, tlaltikpaktli niman nochi okseki tlemach. ¡Yejua katka Jesús iKoneuj toTajtsin!
Jehová okitlali inemilis iKoneuj ijtik María. Yejua nimantsin opeuj noskaltia ijkon ken oksekimej kokonej noskaltiaj ijtik inminan. San ika, yejuin konetsintli iKoneuj toTajtsin katka. Kuakon otlakatiko kampa kintsakuaj yolkamej, ipan ueyikalpan Belén. ¿Tikasikamati aman tleka melak yolpakiyaj iluikaktekitkej ijkuak oteijlikej ika yotlakatka?