Historia 84
Iluikaktekitketl konita María
YEJUIN kualtsin siuatl itoka María. Yejua se israelita, niman chanti ipan se kalpan itoka Nazaret. ToTajtsin kimati ika yejua kualtsin ken nouika. Ika yejon, okititlan iiluikaktekitkauj Gabriel makinotsati. ¿Tikmatstika tlenon Gabriel kijlia María? Matikitakan.
‘Melak xpaki, toTajtsin yomitsteochiuj’, kijlia Gabriel. ‘Jehová mouan nemi.’ María xkixmati akin kinotsa. Niman najmana, pampa xkimati tlenon kijlisneki. Gabriel nimantsin kiyolseuiya.
‘Maka xmomojti, María’, kijlia. ‘ToTajtsin Jehová melak yotikyolpakti. Ika yejon, kichiuas tlen melak kualtsin motech. Xok uejkauis tikpiyas se konetsintli. Niman kipiya ika tiktokayotis Jesús.’
Gabriel kijlia: ‘Yejuin konetsintli nochiuas se akin ueyixtika, niman kitokayotiskej ikoneuj toTajtsin akin Ueyixtika. Jehová kitlalis kentla se tekiuaj ijkon ken David. ¡San ika, Jesús nochipa tekiuajtis, niman itekiuajyo xkeman tlamis!’
‘¿Kenon uelis panos nochi yejuin?’, tetlajtoltia María. ‘Tla xninonamiktia niman xninemi iuan se tlakatl, ¿kenon uelis nikpiyas se konetsintli?’
‘Iespíritu santo toTajtsin uajlas motech’, kijlia Gabriel. ‘Niman mokoneuj kitokayotiskej iKoneuj toTajtsin.’ Kuakon kijlia: ‘Xkilnamiki Elisabet, akin ken tikita. Miyekej kijtouayaj ika yejua yolamajtsintiaka niman ika xueliskia kipiyas ikoneuj. San ika, xuejkauis kipiyas se ikoneuj. Aman uelis tikasikamatis ika toTajtsin nochi ueli kichiua’.
Nimantsin María kijtoua: ‘¡Nejua niitlakeual Jehová! Nopan manochiua ijkon ken yotikijto’. Kuakon iluikaktekitketl oyaj.
María nimantsin yauj kampa Elisabet. Ijkuak Elisabet kikaki María, konetsintli akin nemiya ijtik Elisabet nouiyonia pampa melak opak. Elisabet kiselia espíritu santo, kuakon kijlia María: ‘Tejua titlateochiujtli itech nochi siuamej’. María nemi iuan Elisabet kanaj yeyi metstli, niman sakin oksejpa nokuepa Nazaret.
María nonamiktis iuan se tlakatl itoka José. San ika, ijkuak José kimati ika María kipiyas se konetsintli, kinemilia xkuajli tla iuan nonamiktis. Kuakon iiluikaktekitkauj toTajtsin kijlia: ‘Maka xmomojti timonamiktis iuan María. Pampa toTajtsin yejua akin okimakak ikoneuj’. Kuakon José iuan María nonamiktiaj, niman tlamachiaj matlakati Jesús.
Lucas 1:26-56; Mateo 1:18-25.