Iluikaktekitketl Gabriel okitlajpaloto María

Elisabet kipiaya se ichanejkauj ichpochtli, itoka katka María, akin chantiya ipan ueyikalpan Nazaret ipan Galilea. María nonamiktiskia iuan José, akin kojxinketl katka. Ijkuak Elisabet sa kipolouaya yeyi metstli ika kipiyas ikonetsin, iluikaktekitketl Gabriel okinojtiti María niman okijli: “Kuajli xnemi María. Jehová melak yomitsteochiuj”. Yejua xokasikamat tlen Gabriel okijli. Kuakon yejua okijli María: “Tikpiyas se konetsintli. Kipiya ika tiktokayotis Jesús. Yejua Tekiuaj yes, niman iTekiuajyo xkeman tlamis”.

María okijto: “Nejua ok niichpochtli. ¿Kenon uelis nikpiyas se konetsintli?”. Gabriel okijli: “Jehová nochi ueli kichiua. Iespíritu santo uajlas motech niman tikpiyas se konetsintli. Mochanejkauj Elisabet noijki kipiyas se ikonetsin”. María okijto: “Nejua niitekitkauj Jehová. Nopan manochiua nochi tlen yotikijto”.

María oyaj ipan se ueyikalpan tlen onkatka ipan tepetl, okitlajpaloto Elisabet. Ijkuak okitlajpalo, konetsintli akin nemiya ijtik Elisabet onouiyoni. Elisabet okiseli espíritu santo, niman okijto: “María, Jehová melak yomitsteochiuj. Melak ueyi kijtosneki ika inan noTeko ouajla nochan”. María okijto: “Nikueyichiua Jehová ika nochi noyojlo”. María onokauj iuan Elisabet yeyi metstli, sakin oyaj ichan ipan Nazaret.

Ijkuak José okimat ika María kipiyaskia ikonetsin, yejua xok okinek iuan nonamiktis. San ika, se iiluikaktekitkauj Jehová okinojtiti ipan itemik niman okijli: “Maka xmomojti iuan timonamiktis. Yejua xtlaj kichiua tlen xkuajli”. Kuakon José iuan ononamikti María.