Iluikaktekitkej okiteijlikej ika Jesús otlakat

Tekiuaj ipan Tekiuajyotl romano, César Augusto, otlanauati ika nochimej judíos manokuepakan inchan manoijkuilotij. Kuakon José niman María oyajkej Belén, pampa ichanejkauan José ompa ualeuayaj. Sa achijtsin poliuiya ika María kipiyaskia ikonetsin.

Ijkuak oajsikej Belén, san ouel onokaujkej kampa kintsakuayaj yolkamej. Ompa María okitlakatili ikonetsin niman okitejkuix ika yemanki tlakentli niman melak yoliktsin okitekak ipan se kuexomatl.

Inisiuj Belén, sekimej tlajpixkej kintlajpiayaj inborregos kiyauak ika tlayoua. Kuakon nimantsin se iluikaktekitketl onotelkets imixpan niman itlauil iueyilis Jehová okinyeualo. Tlajpixkej melak onomojtijkej, san ika, iluikaktekitketl okimijli: “Maka xmomojtikan. Nikuajkui melak kuajli tlajtoltin. Amanin otlakat Mesías ipan Belén”. Kuakon miyekej iluikaktekitkej ouajnonextijkej ipan iluikak niman kijtouayaj: “Manoueyichiua toTajtsin ipan iluikak niman maonia yolseuilistli ipan tlaltikpaktli”. Sakin, iluikaktekitkej opopoliujkej. ¿Tlenon okichiujkej tlajpixkej?

Tlajpixkej opeujkej noijliaj: “Nimantsin matiakan Belén”. Kuakon nimantsin oyajkej niman okinextijkej José iuan María kampa kintsakuaj yolkamej niman konetsintli akin kemach yotlakatka.

Nochimej akin okikakej tlen iluikaktekitketl okimijli tlajpixkej, melak otlamojkaitakej. María otlanemili itech itlajtoluan iluikaktekitketl niman xkeman okilkauj. Tlajpixkej onokuepkej kampa inyolkauan, kitlasojkamachiliayaj Jehová ipampa nochi tlen okitakej niman okikakej.