Historia 106

Kisaj kampa okintsaujkaj

XKITA iluikaktekitketl akin kitlapoua puerta. Kinkixtijtika itlatitlankauan Jesús. Matikitakan tleka okintsaujkej.

Xuejkaui ijkuak inomachtijkauan Jesús okiselijkej iespíritu santo toTajtsin. Niman panoua yejuin: Se teotlak Pedro iuan Juan yauej ipan teopan tlen onka Jerusalén. Ompa, nisiu puerta, nemi se tlakatl akin xueli nejnemi. Tlaltikpakchanejkej mojmostla ompa kuikaj niman ijkon makintlajtlanili tomin akin yauej teopan. Ijkuak yejua kimita Pedro iuan Juan, kintlajtlanilia itlaj makimakakan. ¿Tlenon kichiuaskej yejuamej?

Noteltiaj niman konitaj. ‘Xnikpiya tomin’, kijtoua Pedro, ‘san ika, nimitsmakas tlen nikpiya. ¡Ika itoka Jesús, xmokuiteua niman xnejnemi!’ Kuakon, Pedro kajsi ipan imayekma, yejua nimantsin notelketsa niman peua nejnemi. Yejuin kualtsin milagro kinmojkatlachialtia niman kinyolpaktia tlaltikpakchanejkej.

‘Yejuin milagro otikchiujkej ipampa iespíritu santo toTajtsin, tlen okiyoliti Jesús’, kijtoua Pedro. Ijkuak yejua iuan Juan tlajtotokej, sekimej tlamachtijkej ipan tlanauatijli uajlauej. Melak kualanij pampa Pedro iuan Juan kimijlia tlaltikpakchanejkej ika Jesús oyoliuj. Kuakon kinmajsij niman kintsakuaj.

Uajmostla, tlamachtijkej ipan tlanauatijli nosentlaliaj. Ompa kinuajuikaj Pedro, Juan niman yejon tlakatl akin okipajtijkej. ‘¿Tlenon omechpaleui onenkichiujkej yejuin milagro?’, kintlajtoltiaj.

Pedro kijtoua ika ipampa iespíritu santo toTajtsin, akin okiyoliti Jesús. Teopixkej xkimatij tlenon kichiuaskej, pampa kuajli kimatstokej ika melak onochiuj yejuin kuajli milagro. Ika yejon, kimijliaj itlatitlankauan Jesús ika maka sa matlajtokan itech Jesús, niman kinkauiliaj mauiyan.

Panouaj tonaltin, niman itlatitlankauan Jesús xkikajkauaj ika tenojnotsaj itech, niman kinpajtiaj kokoxkej. Yejuin milagros peuaj melak miyekej kimatij. Ika yejon, akin chantij ipan kalpamej tlen nisiu nokauaj itech Jerusalén, kinuajuikaj akin kokoxkej niman ijkon itlatitlankauan Jesús makinpajtikan. Ipampa yejuin, tlamachtijkej ipan tlanauatijli, akin kinnexikolitaj, kinmajsij itlatitlankauan Jesús. San ika, panoua yejuin.

Ika yeuajli, se iiluikaktekitkauj toTajtsin kitlapoua puerta kampa tsaujtokej, ken nikan nesi. Yejuin iluikaktekitketl kijtoua: ‘Xuiyan, xmokauakan teopan niman xkinnojnotsakan tlaltikpakchanejkej’. Uajmostla, ijkuak tlamachtijkej ipan tlanauatijli tlatitlanij makinuajuikakan itlatitlankauan Jesús, xkinnextiaj. Sakin, kinnextiaj ipan teopan niman kinuikaj ipan Sanedrín.

‘Otimechnauatijkej maka sa xtlamachtikan itech Jesús’, kijtouaj tlamachtijkej ipan tlanauatijli. ‘San ika, nochiuiyan ipan Jerusalén yonentlamachtijkej’. Itlatitlankauan Jesús kijtouaj: ‘Kimelaua tiktlakamatiskej achtoj Dios xken nemejuamej yejuan san nentlakamej’. Niman xkikajkauaj ika tenojnotsaj. ¡Melak kuajli tlen tiuelij!

Hechos, tlaxeloltin uejueyimej 3 ontlami ipan 5.