Xtlaj okintelti

Se tomintlajtlanketl akin xueliya nejnemiya, mojmostla notlaliaya ikalakiayan teopan. Se teotlak, okitak ika Pedro niman Juan kalakiyaj teopan. Yejua okimijli: “Nimechtlajtlanilia, itlaj xnechtlayokolikan”. Pedro okijli: “Nimitsmakas itlaj tlen melak ueyi kijtosneki xijkon ken tomin. Ika itokayo Jesús nimitsijlia, ¡xmotelketsa niman xnejnemi!”. Kuakon Pedro okipaleui manokuiteua, ¡niman tlakatl opeuj nejnemi! Tlaltikpakchanejkej melak opajkej ijkuak okitakej yejuin milagro niman miyekej otlaneltokakej.

San ika, teopixkej niman saduceos melak okualankej. Yejuamej okinmasikej tlatitlankej, okinuikakej Sanedrín kampa kintlajtlakolmakaskiaj niman okintlajtoltijkej: “¿Akinon omechmakak kojtilistli ika xpajtikan yejuin tlakatl?”. Pedro okijto: “Tikseliaj kojtilistli itech Cristo Jesús akin onenkimiktijkej”. Tlayekankej ipan tlaneltokijli otsajtsikej: “Maka sa xtlajtokan itech Jesús”. San ika, tlatitlankej okijtokej: “Kipiya ika titlajtoskej itechkopa. Xuelis toteltiskej”.

Ijkuak Pedro niman Juan okinmakaujkej, nimantsin oyajkej kampa oksekimej inomachtijkauan Cristo niman okimijlitoj tlen opanok. San sekan, okitlajtlanilijkej Jehová ipan teoyotl: “Timitstlajtlaniliaj, xtechpaleui matiyolchikaujkej ijkon xtikajkauaskej motekiyo”. Jehová okinmakak espíritu santo niman ijkon xokikajkaujkej ika tenojnotsaj niman ika tepajtiaj. Melak miyekej opeujkej tlaneltokaj. Saduceos melak kinnexikolitayaj tlatitlankej, ika yejon okinmasikej niman okintsajkej. Ika tlayoua, Jehová okititlan iiluikaktekitkauj akin okintlapo puertas kampa tsauktoyaj niman okimijli tlatitlankej: “Xmokuepakan teopan niman ompa xtemachtikan”.

Uajmostla ipan Sanedrín, kampa nemiyaj akin tlayekanayaj ipan tlaneltokijli, yakaj okimijlito: “Cárcel san ken tsauktika, san ika ¡akin ompa onenkintsaujkaj xok ompa nemij! Nemij teopan, kinmachtijtokej tlaltikpakchanejkej”. Kuakon oksejpa okinmasikej niman okinuikakej kampa Sanedrín. Ueyi teopixketl okimijli: “Otimechnauatijkej maka xtlajtokan itech Jesús”. San ika, Pedro otlanankili: “Kimelaua tiktlakamatiskej kachtopa toTajtsin xken nemejuamej akin san nentlakamej”.

Tlayekankej ipan tlaneltokijli melak kualantoyaj niman kinekiyaj kinmiktiskej. San ika, se fariseo itoka katka Gamaliel onotelkets niman okijto: “¡Xmotlajpiyakan! Kanaj toTajtsin nemi imiuan yejuin tlakamej. ¿Yemelak nenkinekij nenkixnamikiskej toTajtsin?”. Yejuamej okikakej. Sakin ijkuak yokintlakouijkej tlatitlankej, oksejpa okinnauatijkej maka sa matenojnotsakan niman okinmakaujkej. San ika, yejon xokintelti. Yejuamej ok tenojnotstoyaj ipan teopan niman techajchan.