Historia 111

Telpochtsintli akin okoch

¡AY, XKITA! ¿Tlenon panotika nikan? ¿Onokoko telpochtsintli akin tlajkaltok ipan tlajli? ¡Xkita, se akin uajkisa itech yejon kajli yejua Pablo! ¿Noijki ueli tikita Timoteo? ¿Nemiya yejuin telpochtsintli itech ventana niman ouetsiko?

Kema, yejon tlen opanok. Pablo kintomilijtoya inomachtijkauan Jesús iTlajtol toTajtsin, nikan ipan ueyikalpan Troas. Yejua kimatstoya ika melak uejkauiskia ijkuak oksejpa kimitaskia, pampa uajmostla kisaskia ipan se barco. Ika yejon, okinnojnots hasta tlajkoyeuajli.

Yejuin telpochtsintli akin itoka Eutico, onotlalijka ipan ventana, niman okoch. ¡Ouetsiko ipan se kajli tlen yeyi nepantik katka! Ika yejon, nikan nesi kenon nochimej melak yonomojtikej. Ijkuak yejuin tlakamej kikuiteuaj telpochtsintli, kitaj ika melak temojti tlen opanok. ¡Yejuin telpochtsintli yomik!

Ijkuak Pablo kita ika yejuin telpochtsintli yomik, kinapaloua. Kuakon kimijlia: ‘Maka xmomojtikan. ¡Yejua kuajli nemi!’ ¡Kema, yejuin melauak! ¡Yonochiuj se milagro! ¡Pablo okiyoliti! Akin nikan nemij melak pakij.

Nochimej oksejpa tlejkouaj kampa nemiyaj niman tlakuaj. Kuakon Pablo kinnojnotsa nochi yeuajli. ¡San ika, aman kuajli tikmatstokej ika Eutico xok oksejpa okoch! Aman Pablo, Timoteo niman akin iuan kistinemij tlejkouaj ipan barco. ¿Tikmatstika kanon yauej?

Pablo sa achijtsin kipoloua tlamis ika yexpa okiteijlito kuajli tlajtoltin ipan miyek kalpamej. San ipan ueyikalpan Éfeso okichiuj yeyi xiuitl ika ompa ouajpanok. Ika yejon, ipan yejuin melak ouejkauj xken ijkuak oyajka ika okpa.

Sakin, ijkuak ouajkiskej ipan barco itech ueyikalpan Troas, xuejkaui onoteltijkej ipan ueyikalpan Mileto. Pampa Éfeso xuejka nokaua, Pablo kinnotsa tlayekankej akin yeuejueyimej ipan tlanechikojli Éfeso mayakan ipan Mileto niman ijkon sa sejpa imiuan tlajtos. Sakin, ijkuak oksejpa tlejkouaj ipan barco, ¡melak kinyolkokoua ijkuak kitaj ika iyajtika Pablo!

Aman barco nokuepa ipan ueyikalpan Cesarea. Ijkuak Pablo nokaua nikan ipan ichan Felipe inomachtijkauj Jesús, teotlajtoketl Ágabo kijtoua ika ijkuak Pablo ajsis Jerusalén kitsakuaskej. Niman yejon tlen panoua, ijkon ken okijto Ágabo. Niman ijkuak yopanok ome xiuitl ika tsaujtika Cesarea, Pablo kititlanij mauiya Roma niman ompa César, intekiuaj romanos, kiyolkuitis. Matikitakan tlenon panoua ijkuak yauj Roma.

Hechos, tlaxeloltin uejueyimej 19 ontlami ipan 26.