Historia 112
Makisaj ipan atlajkotian malta
¡XKITA, apolaktika barco! ¡Yopeuj xoxotoni! ¿Tikimita akin nemij ipan atl? Sekimej yoajsikej itenko mar. ¿Ompa nemi Pablo? Matikitakan tlenon ipan yonochiuj.
Xkilnamiki, ome xiuitl tsaujtoya Pablo ipan ueyikalpan Cesarea. Kuakon kintlejkoltiaj ipan barco, Pablo iuan akin noijki tsaujtokej, niman kinuikaj Roma. Ijkuak sa nisiu nemij ipan atlajkotian Creta, opeuj chikauak ajakakiyaui. Yejuin tlakamej xuelij kiyekanaj barco. Noijki xuelij kitaj Tonaltsintli nion sitlalimej. Sakin, ijkuak yopanokej miyek tonaltin, akin yauej ipan barco xok kineltokaj tla kinmakixtiskej.
Kuakon, Pablo nokuiteua niman kijtoua: ‘Nion se xmikis; san barco xoxotonis. Pampa tlayoua iiluikaktekitkauj toTajtsin ouajla notech niman onechijli: “¡Maka xmomojti, Pablo! Kipiya ika tias itech César, intekiuaj romanos. Niman toTajtsin kinmakixtis nochimej akin imiuan tiauj ipan barco”’.
¡Kanaj ipan tlajkoyeuajli, ijkuak yopanok 14 tonaltin ika opeuj ajakakiyaui, akin tekitij ipan barco kitaj ika xok uejkatlan katka! Pampa ika yeuajli katka, peuaj nomojtiaj yaskej kampa onka temej, kuakon komintlajkalij anclas tlen kiteltia barco. Uajmostla kitaj se playa niman ompa kuikaj barco.
Aman, ijkuak nemij nisiu kampa playa, barco saliui ipan xajli. Kuakon, barco peua xoxotoni pampa melak chikauak ipan yauj atl. Se soldado akin tlayekana kijtoua: ‘Nochimej akin ueliskej ajsiskej inselti ipan playa, maonatlajkalikan niman sakin oksekimej, xkintekitiltikan itlaj tlen mamechpaleui maka nenamimikiskej’. Ijkon kichiuaj, niman 276 tlaltikpakchanejkej akin nemiyaj ipan barco kuajli ajsij ipan playa, ijkon ken yokijtoka iluikaktekitketl.
Atlajkotian itoka Malta. Tlaltikpakchanejkej akin ompa chantij melak kuajli teseliaj, niman kinpaleuiyaj akin uajlayaj ipan barco. Ijkuak yopanok ajakakiyaujtli, Pablo kuikaj ipan okse barco, tlen yauj Roma.