Historia 114

Tlami nochi tlen xkuajli

¿TLENON tikita nikan? Kema, melak miyekej caballos istakej. San ika, xkita kanon ualeuaj. ¡Caballos uajtemouaj iluikak, uajnotlalouaj ipan moxtli! ¿Nemij caballos ipan iluikak?

Ka, yejuin xmelauak caballos. Tikmatij pampa caballos xuelij notlalouaj ipan moxtli, ¿xmelak? San ika, Biblia kema tlajtoua itech caballos ipan iluikak. ¿Tikmatstika tleka?

Pampa yeuejkaui kintekitiltiayaj caballos ijkuak noixnamikiyaj ipan guerras. Kuakon Biblia kijtoua ika sekimej uajtemouaj ipan caballos ne iluikak, niman ijkon kiteititiaj ika toTajtsin imiuan noixnamiki tlaltikpakchanejkej ipan se guerra. ¿Kenon itoka yejuin guerra? Itoka Armagedón, niman ompa kipopolos nochi tlemach xkuajli tlen nochiujtika ipan tlaltikpaktli.

Jesús yejua Akin tlayekanas ipan yejuin guerra tlen itoka Armagedón. Xkilnamiki ika Jehová okitlapejpeni Jesús niman ijkon yejua matekiuajti itech Itekiuajyo. Ika yejon, Jesús kipiya se corona. Niman espada kiteititia ika kinmiktis nochimej akin kixnamikij toTajtsin. ¿Titlamojkaita pampa toTajtsin kinpopolos nochimej tlaltikpakchanejkej xkuakualtin?

Xtejtemo Historia 10. ¿Tlenon tikita? Kema, se ueyi Apachiuilistli tlen okinpopolo tlaltikpakchanejkej xkuakualtin. ¿Akinon okichiuj maapachiuilo? ToTajtsin Jehová. Aman xkita Historia 15. ¿Tlenon panotika ompa? Jehová kinpopoloua Sodoma iuan Gomorra ika tlitl.

Aman xtlapo Historia 33. Xkita tlenon inpan nochiujtika caballos niman incarros egipcios tlen kintekitiltiaj ipan guerra. ¿Akinon okichiuj inpan matoyauiki atl? Jehová. Okichiuj iuan ijkon okinpaleui israelitas. Xtejtemo Historia 36 niman 76. Ompa tikitas ika Jehová noijki otekauili makinpopolokan israelitas pampa xkuakualtin katkaj.

Ika yejon, xtechmojkatlachialtia ika Jehová kinuajtitlanis iiluikaktekitkauan, ijkon makipopolokij nochi tlen xkuajli ipan yejuin tlaltikpaktli. ¿Tlenon panos sakin? Xpano ipan okse página niman matikitakan.

Apocalipsis 16:16; 19:11-16.