Tlamachtijli 2

¿Akinon toTajtsin?

¿Akinon melauak toTajtsin, niman kenon itoka? (1, 2)

¿Kipiya inakayo ken tejuamej? (3)

¿Katlejua ikualneskayouan? (4)

¿Noneki tijkuiskej tajtsitsintin ijkuak tikueyichiuaskej? (5)

¿Kenon kuajli uelis tikixmatiskej toTajtsin? (6)

1. Tlaltikpakchanejkej kiueyichiuaj miyek tlamach. Aman kuajli, Biblia techijlia ika san se nemi toTajtsin MELAUAK. Yejua okichijchiuj nochi tlen onka iluikak niman ipan tlaltikpaktli, niman pampa yejua otechmakak tonemilis, san yejua noneki tikueyichiuaskej (1 Corintios 8:5, 6; Apocalipsis 4:11).

2. Maski tlatlamantik noso sesejneka kixmatij toTajtsin, san se yemelak itoka: JEHOVÁ. Ipan miyek Biblias yokipopolojkej itokayo toTajtsin, yokipatlakej niman yokitlalijkej toTeko noso toTajtsin. Niman ijkuak okikuilojkej Biblia, itokayo Jehová miyekpa nesiya kanaj siete mil (Éxodo 3:15; Salmo 83:18).

3. Jehová xkipiya inakayo ken tejuamej. “ToTajtsin yejua se Espíritu”, kijtoa Biblia (Juan 4:24). Se espíritu sajnoye ueyi nemilistli xijkon ken tejuamej tonemilis. Xkeman yakaj kita toTajtsin. Maski Jehová nemi iluikak, nochi ueli kita (Hebreos 4:13; Juan 1:18). ¿Niman tlenon on espíritu santo? Xijkon ken toTajtsin, san ichikaualis toTajtsin tlen tekititok (Hechos 1:8).

4. Biblia techijlia ikualneskayouan Jehová. Yejuin kijtoa ikualneskayouan: tlasojtlalistli, melajkayotl, tlamachilistli niman kojtilistli (Romanos 11:33, 34; 1 Juan 4:8; Apocalipsis 11:17; 15:3). Noijki kijtoa ika teikneliani, yolkuajli, tetlapopoluia, kuelita kitemakas tlen kuajli niman teijyouia. Kentla titekoneuan tetlakamatkej, noneki tochiuaskej ken yejua (Efesios 5:1, 2).

5. ¿Totlankuaketsaskej niman tikinchiuiliskej teoyotl tajtsitsintin noso tlamachijchiualtin? Ka (Hechos 17:24, 25, 29). Jehová kijtoa san yejua matikueyichiuakan. Xakaj kimaka iueyilis nion tajtsitsintin. Niman, tajtsitsintin xkipiyaj kojtilistli tlen ika techpaleuiskej (Salmo 115:4-8; Isaías 42:8).

6. ¿Kenon kuajli uelis tikixmatiskej toTajtsin? Uelis tikixmatiskej tla tikitaj tlen yokichijchiuj niman tla titlanemiliaj tlenon kinekij techijliskej itech toTajtsin. Tlen yokichijchiuj toTajtsin techititia ika kipiya ueyi kojtilistli niman tlamachilistli. Itech nochi tlen yokichijchiuj techititia itlasojtlalis (Salmo 19:1-6; Romanos 1:20). Noijki uelis tikixmatiskej toTajtsin tla tomachtiaj Biblia. Ompa kuajli techijlia kenon yejua. Noijki techijlia tlenon kineki kichiuas niman tlenon kineki matikchiuakan (Amós 3:7; 2 Timoteo 3:16, 17).

[Pictures on page 5]

Ika tlen yokichijchiuj toTajtsin niman Biblia uelis tikixmatiskej