¿Kenijki uelis tikueyichiuaskej toTajtsin ken yejua kineki?

Ijkon ken otikitakej ipan okse tlamachtijli, toTajtsin xkinselia nochi religiones. San ika, kema uelis tikueyichiuaskej Jehová ijkon ken yejua kineki. ¿Kenijki kineki toTajtsin matikueyichiuakan? (Santiago 1:​27). Matikitakan tlen kijtoua Biblia.

1. ¿Kanon uelis tikitaskej kenijki kineki toTajtsin matikueyichiuakan?

Ipan Biblia uelis tikitaskej kenijki kineki toTajtsin matikueyichiuakan. Sejpa katka, Jesús okijli toTajtsin: “Motlajtoltsin yejua tlen melauak” (Juan 17:​17). Seki religiones xkichiuaj tlen kijtoua iTlajtol toTajtsin, yejuamej san kichiuaj tlen tlakamej yokinejnemilijkej. ¿Kuelita Jehová tlen kichiuaj? Ka, yejua xkuelita ijkuak yakaj xkitlakamati iTlajtol (xkita Marcos 7:9). San ika, yejua melak yolpaki ijkuak tikitaj tlen ijkuiliujtika ipan iTlajtol niman ijkuak tiktlakamatij.

2. ¿Kenijki noneki tikueyichiuaskej Jehová?

ToTajtsin Jehová yejua akin otexchijchiuj, ika yejon, san yejua kinamiki makiseli “ueyilistli” (Apocalipsis 4:​11). Yejuin kijtosneki ika san yejua noneki tiktlasojtlaskej niman san yejua tikueyichiuaskej. ToTajtsin xkuelita matikueyichiuakan ika imágenes noso tajtsitsintin (xkita Isaías 42:8).

Noneki tikueyichiuaskej Jehová ijkon ken yejua kuelita (Romanos 12:1). Yejuin kijtosneki ika noneki tikchiuaskej tlen yejua technauatia niman tichipaujkanemiskej. Akin kitlasojtlaj Jehová kitlakamatij tlen yejua yokijto itech namiktilistli. Noijki xpokij noso xtlachichinaj, xkinkuij drogas nion xtlauanij.a

3. ¿Tleka noneki tikueyichiuaskej toTajtsin imiuan akin noijki kinekij kitlakamatiskej?

Ipan tlanechikoltin uelis san sekan tikueyichiuaskej Jehová (Salmo 111:​1, 2). Melak kuajli ijkuak titlakuikaj ipan tlanechikoltin pampa ijkon noijki tikueyichiuaj toTajtsin (xkita Salmo 104:​33). Jehová techtlajtlanilia matosentlalikan pampa melak techtlasojtla. Yejua kimatstika ika tlanechikoltin techpaleuiskej nochipa matiyolpakikan. Ijkuak tosentlaliaj, titeyolchikauaj niman oksekimej noijki techyolchikauaj.

OKSEKI XKASIKAMATI

4. ToTajtsin xkuelita matikueyichiuakan ika imágenes

VIDEO: ¿Kuelita toTajtsin matikueyichiuakan ika imágenes? (3:​26)

• Yeuejkaui, sekimej itekipanojkauan toTajtsin okichijchiujkej se imagen niman ijkon ika kiueyichiuaskej toTajtsin, san ika ¿tlenon opanok pampa ijkon okichiujkej?

Sekimej kinemiliaj ika toTajtsin kineki matikueyichiuakan ika imágenes, san ika ¿xmelak ika tla ijkon tikchiuaj tikteititijtoskiaj ika más tikintlasojtlaj imágenes xijkon ken toTajtsin? Xkitakan Éxodo 20:​4-6 niman Salmo 106:​35, 36, niman xtlajtokan itech yejuin:

• ¿Katlejua imágenes kinueyichiuaj kampa tejua tichanti?

• ¿Kuelita toTajtsin matikueyichiuakan ika imágenes?

• ¿Tiknemilia ika kuajli ika oksekimej kiueyichiuaj toTajtsin ika imágenes? ¿Tleka ijkon tiknemilia?

5. Melak techpaleuis tla san Jehová tikueyichiuaj

VIDEO: Biblia yonechpaleui maka sa manikneltoka tlen xmelauak (5:​16)

Xkitakan Salmo 91:​14 niman xtlajtokan itech yejuin:

• Tla tikititiaj Jehová ika tiktlasojtlaj niman ika san yejua tikueyichiuaj, ¿tlenon yokijto kichiuas topampa?

6. Tikueyichiuaj toTajtsin ipan tlanechikoltin

Ijkuak titlakuikaj niman titlanankiliaj ipan tlanechikoltin, tikueyichiuaj Jehová niman titeyolchikauaj. Xkitakan Salmo 22:​22 niman xtlajtokan itech yejuin:

• ¿Tikuelita tijkakis kenijki tlanankiliaj akin yauej ipan tlanechikojli?

• ¿Tikuelitaskia titlanankilis ipan tlanechikojli?

7. Jehová kuelita matikimijlikan oksekimej tlen yotiuelkej

Maski san kanon tinemiskej, uelis tikteijliskej tlen yotiuelkej ipan Biblia. Xkitakan Salmo 9:1 niman 34:1, niman xtlajtokan itech yejuin:

• Itech nochi tlen yotiuel ipan Biblia, ¿tlenon tikuelitaskia tikteijlis?

TLEN OTIUEL

ToTajtsin melak yolpaki ijkuak san yejua tikueyichiuaj, ijkuak titlakuikaj niman titlanankiliaj ipan tlanechikoltin niman noijki ijkuak tikimijliaj oksekimej tlen yotiuelkej ipan Biblia.

¿Kenon titlanankiliskia?

• ¿Kanon uelis tikitaskej kenijki kineki toTajtsin matikueyichiuakan?

• ¿Tleka noneki san Jehová tikueyichiuaskej?

• ¿Tleka noneki tikueyichiuaskej toTajtsin imiuan akin noijki kinekij kitlakamatiskej?

OKSEKI XKITA

Se siuatl melak yolpaki pampa xok kinueyichiua imágenes. Xkita tlenon kijtoua ipan tlamachtijli “Xok nikinueyichiua imágenes”.

“Biblia okichiuj manopatlakan” (Amatl Tekakistilijketl, 1 de julio de 2011)

Xkita tlenon uelis mitspaleuis niman ijkon uelis titlanankilis ipan tlanechikoltin.

“Matikueyichiuakan Jehová ipan tlanechikojli” (Amatl Tekakistilijketl, enero de 2019)

Se telpochtli akin melak nomojtiaya okitak ika tlanechikoltin melak okipaleuijkej.

Jehová najmana notech (3:​07)

Miyekej kijtouaj ika kuajli tla tikinpiyaj cruces niman ijkon ika tikueyichiuaskej toTajtsin, san ika ¿tlenon kijtoua Biblia?

“¿Tleka iteixpantijkauan Jehová xkitekitiltiaj cruz?” (Tlamachtijli de jw.org)