Tlamachtijli 3

¿Akinon Jesucristo?

¿Tleka kitokayotiaj Jesús iyenkuiyoj toTajtsin? (1)

¿Tleka kitokayotiaj “Tlajtojli”? (1)

¿Tleka ouajla Jesús kentla tlakatl ipan in tlaltikpaktli? (2-4)

¿Tleka okichiuj milagros? (5)

¿Tlenon kichiuas Jesús xuejkaujtipa? (6)

1. Ijkuak xiuajlaya Jesús ipan tlaltikpaktli, nemiya iluikak kentla espíritu. ToTajtsin kachtopa okichijchiuj Jesús, sakin okseki tlemach; ika on kitokayotiaj iyenkuiyoj toTajtsin (Colosenses 1:15; Revelación [Apocalipsis] 3:14, NM). ToTajtsin xakaj okipaleui ijkuak okichijchiuj Jesús, san yejua ijkon okichijchiujke. Jehová okikuik Jesús ijkuak nemiya iluikak, kentla kuajli tlapaleuijketl okichijchiuj nochi tlen onka iluikak niman ipan tlaltikpaktli (Proverbios 8:22-31; Colosenses 1:16, 17). Jesús noijki kitekakistiliaya tlajtojli ijkuak toTajtsin kititlaniya. Ika on Jesús noijki kitokayotiaj “Tlajtojli” (Juan 1:1-3; Apocalipsis 19:13).

2. ToTajtsin okuajtitlan ikoneuj ipan tlaltikpaktli ijkuak okuajtlali inemilis ijtik María. Kuakon Jesús xokipix itaj tlaltikpakchanej; ika on xokiseli tlajtlakojli. ToTajtsin okuajtitlan Jesús nikan ipan tlaltikpaktli, ¿tleka? 1) otechmachtiko tlen melauak itech toTajtsin (Juan 18:37), 2) omelajkanemiko niman ijkon otechititiko kenon tikchiuaskej (1 Pedro 2:21) niman 3) okitemakako inemilis niman ijkon otechmakixtiko itech tlajtlakojli niman mikilistli. ¿Tleka nonekiya manotemaka? (Mateo 20:28.)

3. Ijkuak kachtopa tlakatl, Adán, xokitlakamat itlanauatil toTajtsin, okichiuj tlen Biblia kitokayotia “tlajtlakojli”. Kuakon toTajtsin okijli ika mikiskia (Génesis 3:17-19). Pampa xok kitlakamatiya itlanauatil toTajtsin, onochiuj tlajtlakole. Yolik opeuj ueuentsintia, niman sakin omik. Adán okimpanoltili tlajtlakojli nochimej ikoneuan. Ika on tejuamej noijki tiueuentsintiaj, tikualoj niman timikij. ¿Kenon ueliskiaj makisaskej tlaltikpakchanejkej? (Romanos 3:23; 5:12.)

4. Jesús xtlajtlakole katka, ijkon ken Adán. Niman Jesús nochipa okitlakamat toTajtsin, maski opanok ipan uejueyimej tetlatlatalismej. Ika on, yejua ueliskia kitemakaskia inemilis tlen xkipiaya tlajtlakojli niman ijkon kitlaxtlauas itlajtlakol Adán. Ipan Biblia ijkuak nochiua yejuin kitokayotia ‘tlaxtlauijliʼ. Ijkon, ikoneuan Adán ueliskiaj makisaskej itech mikilistli. Nochimej akin kineltokaj Jesús ueliskej kintlapopoluiskej intlajtlakol niman kiseliskej nemilistli tlen xkeman tlamis (1 Timoteo 2: 5, 6; Juan 3:16; Romanos 5:18, 19).

5. Ijkuak onen ipan tlaltikpaktli, Jesús okimpajti kokoxkej, okintlakualti akin apismikiyaj niman okitelti ajakakiyautin. Ta okinkuiteuj mijkej. ¿Tleka okichiuj milagros? 1) Kimikneliaya tlaltikpakchanejkej akin tlajyouiayaj niman kinekiya kimpaleuis. 2)  Imilagros okiteititijkej ika iKoneuj toTajtsin katka. 3) Okiteititijkej tlenon kichiuas impampa tlaltikpakchanejkej akin tetlakamatkej, ijkuak tlayekanas kentla Tekiuaj nikan ipan tlaltikpaktli (Mateo 14:14; Marcos 2:10-12; Juan 5:28, 29).

6. Jesús omik, toTajtsin okikuiteuj kentla se espíritu niman oksepa oya iluikak (1 Pedro 3:18). Sakin, toTajtsin okitlali kentla Tekiuaj. Jesús xuejkaujtipa kipopolos nochi tlen xkuajli niman tlajyouilistli ipan in tlaltikpaktli (Salmo 37:9-11; Proverbios 2:21, 22).

[Pictures on page 7]

Ijkuak Jesús ouajla ipan tlaltikpaktli, otemachti, okichiuj milagros niman ta okitemakak inemilis topampa