Tlamachtijli 4

¿Akinon Diablo?

¿Kenon onemiko Diablo? (1, 2)

¿Kenon kinkajkayaua tlaltikpakchanejkej? (3-7)

¿Tleka noneki tikixnamikis Diablo? (7)

1. Tlajtojli “diablo” kijtosneki yakaj akin tlakajkayaua itech okse tlaltikpakchanej. “Satanás” kijtosneki tlauelikniuj noso teixnamijketl. Yejuin tlajtoltin kuajli kinamiki itlauelikniuj toTajtsin. Achtopa katka se iluikaktekitketl tlen xkipiaya tlajtlakojli akin nemiya iluikak iuan toTajtsin, san ika, sakin onoueyimat niman okinek makiueyichiuakan, tlen san toTajtsin kinamiki kiselis (Mateo 4:8-10).

2. Yejuin iluikaktekitketl, Satanás, okikuik se kouatl tlen ika okinots Eva, niman ika itlakajkayaualisuan, okichiuj maka makitlakamati toTajtsin. Ijkon Satanás okixnamik “iueyitlayekanalis” toTajtsin. Okijtosnek ika toTajtsin xkuajli ken tekiuajti niman xkuajli ken techyekana. Noijki okijtosnek ika nion se, xmelajkanemiskia itech toTajtsin. Ijkuak ijkon okichiuj onokuep itlauelikniuj toTajtsin. Ika on okitokayotijkej Satanás niman Diablo (Génesis 3:1-5; Job 1:8-11; Apocalipsis 12:9).

3. Satanás kiyejyekoa kinkajkayauas tlaltikpakchanejkej niman ijkon makiueyichiuakan (2 Corintios 11:3, 14). Kichiua ika tlaneltokilistli xmelauak. Tla se tlaneltokilistli temachtia tlen xmelauak itech toTajtsin, kichiujtika tlen Satanás kineki (Juan 8:44). Tlaltikpakchanejkej akin kipiyaj tlaneltokiltin xmelajkej kinemiliaj kiueyichiuaj akin yemelak toTajtsin, san ika Satanás akin yemelak kiueyichiujtokej, pampa ‘yejuan kimpiaj on tlaltikpaktlakamej ken intajtsinʼ (2 Corintios 4:4).

4. Satanás noijki kikui naualyotl niman ijkon kimpiya tlaltikpakchanejkej ipan imaj. Sekimej kiminotsaj espíritus makimpaleuikan, makinchiuilikan tlen xkuajli oksekimej, makijtokan tlen nochiuas noso makichiuakan milagros. Satanás yejua akin kichiua mapano nochi yejuin tlajtlamach. Tla tiknekij tikpaktiskej toTajtsin, maka matikchiuakan naualyotl (Deuteronomio 18:10-12; Hechos 19:18, 19).

5. Satanás noijki kinkajkayaua tlaltikpakchanejkej ijkuak kichiua manoueyimatikan pampa sekimej chipaujkej niman oksekimej ka, niman ijkuak kichiua makinueyichiuakan tekiuajkej. Sekimej kinemiliaj ika ueyixtokej pampa chipaujkej noso ika tlajtoaj okse tlajtojli xijkon ken oksekimej. San ika yejon xmelak (Hechos 10:34, 35). Oksekimej kichiaj tekiuajkej makinyektlalilikan intlaueluan tlaltikpakchanejkej. Ijkon kiteititiaj ika xkiseliaj iTekiuajyo toTajtsin, akin kema uelis kiyektlalis totlaueluan (1 Corintios 15:24).

6. Satanás noijki kinkajkayaua tlaltikpakchanejkej ijkuak kiminmapeua makileuikan kichiuaskej tlajtlakojli. Jehová xkineki matikchiuakan pampa kimatstika ika techijtlakos (Gálatas 6:7, 8). Uelis, oksekimej tlaltikpakchanejkej kinekiskej imiuan xchiua yejon. San ika, xkilnamiki ika Satanás yejua akin kineki xchiua yejon tlajtlamach (1 Corintios 6:9, 10; 15:33).

7. Satanás kineki xkaua Jehová ika on uelis kichiuas mamitstlaueltokakan. Kanaj sekimej mochanejkauan uelis sajnoye kualaniskej pampa tejua timomachtia Biblia. Oksekimej uelis mitspipinaujtiskej. San ika, xnemili ¿akinon omitsmakak monemilis? Satanás kineki mitsmojtis niman ijkon xkajkaua xmomachti itech Jehová. Maka xkauili mamistsakuili (Mateo 10:34-39; 1 Pedro 5:8, 9). Tla tikixnamiki Diablo, uelis tikpaktis Jehová niman tikteititis ika tikpaleuiya iUeyitlayekanalis (Proverbios 27:11).

[Pictures on page 9]

Satanás tekajkayaua ika tlaneltokilistli xmelauak, naualyotl niman ijkuak kichiua makinueyichiuakan tekiuajkej

[Picture on page 9]

Tla timomachtia itech Jehová uelis tikixnamikis Satanás