Tlamachtijli 5
¿Tlenon kineki kichiuas toTajtsin ipan tlaltikpaktli?
¿Tleka Jehová okichijchiuj tlaltikpaktli? (1, 2)
¿Tleka aman tlaltikpaktli xse xochitlalpan? (3)
¿Tlenon impan nochiuas tlaltikpakchanejkej xkuakualtin? (4)
¿Tlenon kichiuas Jesús impampa kokoxkej?, ¿ueuentsitsintin? ¿niman mijkej? (5, 6)
¿Tlenon noneki tikchiuas tla tikneki tikselis tlateochiualismej? (7)
1. Jehová okichijchiuj tlaltikpaktli niman ijkon ompa manemikan nochipa tlaltikpakchanejkej. Yejua kinekiya matento ika tlaltikpakchanejkej kuakualtin (Salmo 115:16; Isaías 45:18). Tlaltikpaktli xkeman poliuis; nochipa onias (Salmo 104:5; Eclesiastés 1:4).
2. Ijkuak toTajtsin xikichijchiuaya tlakatl, okitlapejpeni tlajkotsin tlaltikpaktli, niman okikuep se kualtsin xochitlalpan niman okitokayoti xochitlalpan Edén. Ompa okitlali kachtopa tlakatl niman kachtopa siuatl: Adán iuan Eva. ToTajtsin kinekiya makipiyakan inkoneuan niman makitemiltikan nochi tlaltikpaktli. Ika yolik kikuepaskia nochi tlaltikpaktli ipan se xochitlalpan (Génesis 1:28; 2:8, 15).
3. Adán iuan Eva xokitlakamatkej itlanauatiluan toTajtsin maski kimatstoyaj tlenon impan nochiuaskia. Ika on, Jehová okinkixti itech xochitlalpan Edén, niman ijkon opoliuj xochitlalpan (Génesis 3:1-6, 23). San ika Jehová xkilkaua tlenon kineki kichiuas ipan tlaltikpaktli. Yejua kijtoa ika kikuepas se xochitlalpan kampa nemiskej nochipa tlaltikpakchanejkej. ¿Kenon kichiuas? (Salmo 37:29.)
4. Kachtopa noneki makimpopolokan tlaltikpakchanejkej xkuakualtin, niman ijkon uelis nochiuas se xochitlalpan (Colosenses 3:6). Yejuin nochiuas ipan Armagedón, iguerra toTajtsin kampa kipopolos nochi tlen xkuajli. Ijkuakon, Satanás kitsakuaskej mil xiuitl, kijtosneki xok yakaj nokauas akin xkuajli, makijtlakojto tlaltikpaktli. San makisaskej akin kitekichiuiliaj toTajtsin (Apocalipsis 16:14, 16; 20:1-3).
5. Kuakon Jesucristo tekiuajtis ipan tlaltikpaktli mil xiuitl (Apocalipsis 20:6). Aajchijtsin kipopolojtias tlajtlakojli itech totlanemilis niman tonakayo. Tochiuaskej xtitlajtlakolejkej ken Adán iuan Eva katkaj achto tlajtlakoskiaj. Kuakon xok tikualoskej, xok tiueuentsintiaskej niman xok timikiskej. Kokoxkej pajtiskej niman ueuentsitsintin oksepa telpochtiaskej (Job 33:25; Isaías 33:24; Apocalipsis 21:4).
6. Ijkuak Jesús Tekiuajtis Mil Xiuitl, tlaltikpakchanejkej akin xkikauaj toTajtsin tekitiskej niman kikuepaskej tlaltikpaktli ipan se xochitlalpan (Mateo 5:5). Noijki, sajnoye miyekej tlaltikpakchanejkej yoliuiskej niman oksepa nemiskej kentla tlaltikpakchanejkej ipan tlaltikpaktli (Hechos 24:15). Tla kichiuaj tlen toTajtsin kintlajtlanilia, nemiskej nochipa ipan tlaltikpaktli. Tla xijkon okichiujkej, kimpopoloskej iyeka (Juan 5:28, 29; Apocalipsis 20:11-15).
7. Ijkon nochiuas ipan tlaltikpaktli tlen toTajtsin kinekiya. ¿Tikuelitaskia tikselis yejuin tlateochiualismej? Tla kema, noneki timomachtis itech Jehová niman tiktlakamatis itlanauatiluan. Uelis mitspaleuis tikchiuas yejon tla kampa tichanti, timosentlalia ipan Kajli kampa nosentlaliaj iTeixpantijkauan Jehová (Isaías 11:9; Hebreos 10:24, 25).
[Picture on page 10]
Xochitlalpan tlen opoliuj
[Pictures on page 11]
Tla yopanok Armagedón, tlaltikpaktli kikuepaskej se xochitlalpan