¿Tlenon kineki kichiuas toTajtsin ika tlaltikpaktli?

1. ¿Tleka toTajtsin okichijchiuj tlaltikpaktli?

Jehová okinmakak Adán iuan Eva se tlaltikpaktli. Yejuin tlaltikpaktli ipan tichantitokej. San ika, yejuin kachtopa tlaltikpakchanejkej xokinchijchiujkej manemikan iluikak. ToTajtsin okinchijchiuj iluikaktekitkej akin nemiskiaj iluikak (Job 38:4, 7). ToTajtsin okitlali tlakatl ipan se kualtsin tlajli, itoka Edén (Génesis 2:15-17). Jehová kinekiya ika yejuin tlakatl iuan ikoneuan manemikan nochipa ika pakilistli ipan se kualtsin tlaltikpaktli. Xkita Salmo 37:29 niman 115:16.

Kachtopa, san yejuin xochitlalpan Edén kualtsin katka. Adán iuan Eva kitemiltiskiaj tlaltikpaktli ika inkoneuan. Ijkon nochiuiyan ipan tlaltikpaktli tlakualtsinkan yeskia (Génesis 1:28). Ipan tlaltikpaktli nochipa ipan chantiskej niman xkeman popoliuis. Xkita Salmo 104:5.

Xkita video ¿Tleka toTajtsin okichijchiuj tlaltikpaktli?

2. ¿Tleka aman tlaltikpaktli xse xochitlalpan?

Adán iuan Eva xokitlakamatkej toTajtsin, ika yejon, Jehová okinkixti ipan yejuin kualtsin tlaltikpaktli. Yejon Xochitlalpan opoliuj, niman nion se tlaltikpakchane xueli oksejpa kiyektlalia ijkon ken katka. Biblia kijtoua ika ipan tlaltikpaktli nemij tlaltikpakchanejkej akin kichiuaj tlen xkuajli (Job 9:24). Xkita Génesis 3:23, 24.

Kuakon, ¿kijtosneki ika Jehová yokilkauj tlen kinekiya itech tlaltikpakchanejkej? ¡Ka! Yejua nochi ueli kichiua. Niman xsan ompa kikauas, kichiuas tlen kineki (Isaías 45:18). Jehová kichiuas manemikan tlaltikpakchanejkej ken yejua kinekiya. Xkita Salmo 37:11, 34.

3. ¿Kenon oksejpa toTajtsin kikuepas tlaltikpaktli se xochitlalpan?

Ijkuak Jesús tlayekanas ipan iTekiuajyo toTajtsin kichiuas oksejpa maonia se kualtsin tlajli. Ipan guerra itoka Armagedón, Jesús kinyekanas iiluikaktekitkauan toTajtsin niman kinpopolos akin kixnamikij toTajtsin. Kuakon Jesús kitsakuas Satanás mil xiuitl. Akin kitekichiuiliaj toTajtsin makisaskej itech yejon guerra pampa Jesús kinyekanas niman kintlajpiyas. Yejuamej nemiskej ika inyojlo nochipa ipan Xochitlalpan. Xkita Apocalipsis (Revelación) 20:1-3 niman 21:3, 4.

4. ¿Kemanon tlamis tlajyouilistli?

¿Kemanon kipopolos toTajtsin nochi tlen xkuajli? Jesús okijto “tlenon panotos” ijkuak sa achijtsin poliuiskia. Tlen panotika ipan tlaltikpaktli nesi ika kimijtlakojtika tlaltikpakchanejkej niman techititia ‘ika sa achijtsin poliui ijkuak tlamis tlajtlamach ken nochiua ipan tlaltikpaktli’. Xkita Mateo 24:3, NM, Mateo 24:7-14, 21, 22.

Ipan mil xiuitl ijkuak Jesús uajtlanauatijtos ipan tlaltikpaktli, kipopolos nochi tlen techtlajyouiltia (Isaías 9:6, 7; 11:9). Maski Jesús nemi kentla tekiuaj, noijki tekitis kentla Ueyi Teopixki niman kinpopolouilis intlajtlakoluan akin kitlasojtlaj toTajtsin. Ijkon, Jesús kichiuas maka sa yakaj makualo, maueuentsintia niman mamiki. Xkita Isaías 25:8 niman 33:24.

5. ¿Akinon nemiskej ipan Xochitlalpan?

Akin kitlakamatij toTajtsin nemiskej ipan Xochitlalpan (1 Juan 2:17). Jesús okintitlan akin itech tlaneltokayaj makintejtemotij akin yolyemankej, makinmachtikan tlenon uelis kichiuaskej niman ijkon nemiskej kuajli ixpan toTajtsin. Ipan yejuin tonajli, Jehová kinmachtijtok melak miyek tlaltikpakchanejkej kenon nemiskej ipan Xochitlalpan (Sofonías 2:3). Ipan Kajli Kampa nosentlaliaj iTeixpantijkauan Jehová, kinmachtiaj tlakamej kenon kintlasojtlaskej insiuauan iuan inkoneuan, niman siuamej kinmachtiaj kenon kintlasojtlaskej inueuentsitsinuan iuan inkoneuan. Tajtin iuan inkoneuan san sekan kiueyichiuaj toTajtsin niman nomachtiaj kenon uelis kinpaleuis yejon kualtsin tlajtojli tlen techijlia toTajtsin. Xkita Miqueas 4:1-4.