Tlamachtijli 6
¿Tlenon on iTekiuajyo toTajtsin?
¿Kanon onka itekiuajyo toTajtsin? (1)
¿Akinon iTekiuaj? (2)
¿Nemij oksekimej akin iuan tlayekanaskej Tekiuaj? Tla kema, ¿kechmej? (3)
¿Tlenon techititia ika tinemij sa itlamiyan tonaltin? (4)
¿Tlenon kichiuas iTekiuajyo toTajtsin ipampa tlaltikpakchanejkej? (5-7)
1. Ijkuak Jesús onen ipan tlaltikpaktli, okinmachti inomachtijkauan makitlajtlanikan ipan se teoyotl mauajla iTekiuajyo toTajtsin. Tlajtojli “tekiuajyotl” kijtosneki se tekiuajyotl tlen kipiya se tekiuaj akin tlayekana. ITekiuajyo toTajtsin xijkon ken oksekimej tekiuajyomej. Onka iluikak niman tlayekanas ipan nochi tlaltikpaktli. Kiueyitlalis itokatsin toTajtsin, kichiuas manochiua ipan tlaltikpaktli tlen toTajtsin kuelita ijkon ken nochiua iluikak (Mateo 6:9, 10).
2. ToTajtsin okijli Jesús ika yejua yeskia Tekiuaj ipan itekiuajyo (Lucas 1:30-33). Ijkuak Jesús onen nikan ipan tlaltikpaktli, okiteititi ika yeskia se Tekiuaj yolkuajli, yolmelajki niman xtlajtlakole. Ijkuak oksepa oya iluikak, xniman okitlalijkej kentla Tekiuaj itech iTekiuajyo toTajtsin (Hebreos 10:12, 13). Ipan xiuitl 1914, Jehová okimakak tekiuajyotl ken yokijlika. Ijkuakon, Jesús opeuj tekiuajti iluikak kentla tekiuaj akin Jehová okitlali (Apocalipsis 11:15).
3. Jehová yokintlapejpeni akin xkikauaj, sekimej tlakamej niman siuamej ipan in tlaltikpaktli niman ijkon mauiyan iluikak. Yejuin tlakamej niman siuamej iuan Jesús, kinyekanaskej tlaltikpakchanejkej kentla tekiuajkej, teyolkuitijkej niman teopixkej (Lucas 22:28-30; Apocalipsis 5:9, 10). Jesús okijto ika ‘xmiyekejʼ akin iuan tlayekanaskej ipan itekiuajyo. San 144,000 (Lucas 12:32; Apocalipsis 14:1-3).
4. Nimantsin ijkuak Jesús onochiuj Tekiuaj, okikixti Satanás niman iiluikaktekitkej xkuakualtin niman okinuajxini nikan ipan tlaltikpaktli. Ika on, ipan 1914 opeuj sajnoye tlaijtlakaui ipan tlaltikpaktli (Apocalipsis 12:9, 12). Guerras, apistli, kokolistli, miyekiya nochi tlen xkuajli..., nochi yejon se “tlamauisojli” ika Jesús itekiuajtitok niman ika tinemij sa itlamiyan tonaltin (Mateo 24:3, 7, 8, 12; Lucas 21:10, 11; 2 Timoteo 3:1-5).
5. Xueyi poliui ijkuak Jesús kinyolkuitis tlaltikpakchanejkej niman kinxelos ken se tlajpixketl kinxeloa iborreguitos itech chivos. Kimita kentla “iborreguitos” akin kitlakamatij niman xkeman kikauaj, niman kiminmakas nemilistli tlen xkeman tlamis. Niman “chivos” yeskej akin xokiselijkej itekiuajkayo toTajtsin (Mateo 25:31-34, 46). Xuejkaujtipa, Jesús kimpopolos nochimej tlaltikpakchanejkej akin kichiuaj kentla chivos (2 Tesalonicenses 1:6-9). Tla tejua tikneki timochiuas se “iborreguito” Jesús, noneki tijkakis tlen noijtoa itech in Tekiuajyotl niman tikchiuas tlen timomachtia (Mateo 24:14).
6. Ipan in tlaltikpaktli onka miyek países niman nochimej kipiyaj intekiuaj. Kemantika sa no yejuamej nouisokij. San ika iTekiuajyo toTajtsin kintekipatlas nochi yejuin tekiuajkej tlaltikpakchanejkej. San yejuin tekiuajyotl onias ipan tlaltikpaktli (Daniel 2:44). Kuakon xok onias guerras, xok nomiktilos nion xnochiuas tlen xkuajli. Nochimej nemiskej san sekan niman ika yolseuilistli (Miqueas 4:3, 4).
7. Ijkuak Tekiuajtis Jesús Mil Xiuitl, tlaltikpakchanejkej akin xokikaujkej toTajtsin xok tlajtlakolejkej yeskej niman tlaltikpaktli nokuepas ipan se xochitlalpan. Ijkuak ontlamis yejon mil xiuitl Jesús yotlan kichiuaj nochi tlen toTajtsin kinekiya makichiua. Kuakon kimaktilis Tekiuajyotl iTaj (1 Corintios 15:24). ¿Tleka xtikintomilia akin imiuan timouika niman mochanejkauan tlen kichiuas iTekiuajyo toTajtsin?
[Epígrafe de la página 13]
Ijkuak tekiuajtis Jesús, xok notlauelitalos niman xok nonexikoitalos