Tlamachtijli 10

Tlen toTajtsin kitlauelita

¿Kenon noneki tikitas tlen toTajtsin kijtoa xkuajli? (1)

¿Tlenon kijtosneki auilnemilistli niman tleka xkuajli? (2)

Akin kitokaj Cristo, ¿kenon noneki kitaskej tlakajkayaualistli? (3)

¿Auijli ika tomin? (3)

¿Tlachtekilistli? (3)

¿Tlauisokilistli? (4)

¿Naualyotl? (5)

¿Tlauanilistli? (6)

¿Kenon uelis se xok kichiuas tlen xkuajli? (7)

1. Akin kitekichiuiliaj toTajtsin kitlasojtlaj tlen kuajli, san ika noijki noneki makitlauelitakan tlen xkuajli (Romanos 12:9). Yejuin kijtosneki xtikchiuas tlen toTajtsin kitlauelita. ¿Katlejuamej?

2. Auilnemilistli: Timotekas iuan akin xitimonamiktia, tijkakayauas moixnamik, timotekas iuan se yolki, noso iuan akin ken tikita niman ijkuak omemej tlakamej notekaj, yejuin sajnoye ueyi tlajtlakojli itech toTajtsin (Levítico 18:6; Romanos 1:26, 27; 1 Corintios 6:9, 10). Tla chantij se tlakatl iuan se siuatl niman xnonamiktiaj, noneki noxeloskej noso, manonamiktikan ixpan tekiuajkej (Hebreos 13:4).

3. Tlakajkayaualistli, auijli ika tomin, niman tlachtekilistli: ToTajtsin Jehová xueli tlakajkayaua (Tito 1:2). Kuakon akin kinekij kuajli nemiskej ixpan toTajtsin maka matlakajkayauakan (Proverbios 6:16-19; Colosenses 3:9, 10). Nochi auiltin ika tomin ompa peua ileuilistli. Ika on, akin kitokaj Cristo xnauiltiaj ika barajas nion okse auijli kampa notlatlanij ika tomin (Efesios 5:3-5). Noijki xtlachtekij nion xkikoaj tlen san yokichtejkej niman xkontilanaj tlen xtetlatlaniliaj (Éxodo 20:15; Efesios 4:28).

4. Nimantsin tikualanis niman tlauisokilistli: Sajnoye tikualanis uelis kichiuas xtlauisoki (Génesis 4:5-8). Akin tlauisokij xuelis nouikaskej iuan toTajtsin (Salmo 11:5; Proverbios 22:24, 25). Xkuajli tla totlakuepiltiaj noso noijki ijkon titechiuiliaj ijkuak yakaj texchiuilia tlen xkuajli (Proverbios 24:29; Romanos 12:17-21).

5. Naualyotl: Sekimej kiminotsaj espíritus makinpajtilikan inkokolisuan. Oksekimej kiminaualuiaj intlauelikniuan noso ta kampa kimimiktiaj. Nochi yejuin ualeujtika itech Satanás. Kuakon, akin kitokaj Cristo maka makichiuakan yejon (Deuteronomio 18:9-13). Xtikmakasiskej naualyotl tla tinemij nisiu itech Jehová (Proverbios 18:10).

6. Tlauanilistli: Tikonis achijtsin mezcal, cerveza noso okse, xkijtosneki tla se tlajtlakojli (Salmo 104:15; 1 Timoteo 5:23). San ika toTajtsin kijtoa xkuajli tla sajnoye tikoni noso titlauani (1 Corintios 5:11-13; 1 Timoteo 3:8). Tla titlauanis uelis mitsasis kokolistli niman tikinxoxotonis mochanejkauan. Niman noijki, xouijtika uelis tikchiuas tlen xkuajli (Proverbios 23:20, 21, 29-35).

7. Tlaltikpakchanejkej akin kichiuaj tlen toTajtsin xkuelita xnemiskej itech itekiuajyo toTajtsin (Gálatas 5:19-21). Tla tejua yemelak tiktlasojtla toTajtsin niman tikneki tikpaktis, uelis xok tikchiuas tlen xkuajli (1 Juan 5:3). Xtlauelita tlen toTajtsin kijtoa xkuajli (Romanos 12:9). Xmouika iuan akin kichiuaj tlen toTajtsin kineki (Proverbios 13:20). Akin tlaneltokaj ken tejuamej niman kipiya chikauak intlaneltokilis uelis techpaleuiskej (Santiago 5:14). Xmatsto ika, Jehová mitsmakas itlapaleuilis itech teoyotl (Filipenses 4:6, 7, 13).

[Pictures on page 20, 21]

ToTajtsin kitlauelita tlauanilistli, tlachtekilistli, auijli ika tomin niman tlauisokilistli