Tlamachtijli 14
Kenon tekitij iteixpantijkauan Jehová
¿Kemanon opeuj tekipanouaj iteixpantijkauan Jehová? (1)
¿Kenon nochiua ijkuak nosentlaliaj iteixpantijkauan Jehová? (2)
¿Kanon ualeua tomin tlen kikuij? (3)
¿Akinon tlayekana kampa nosentlaliaj (4)
¿Tlenon okseki nechikoltin uejueyimej kipiyaj nochi xiujtin? (5)
¿Tlenon tekitl kichiuaj ipan kajli sajnoye ueyi onka Nueva York, niman ipan okseki uejueyimej kaltin tlen kipiyaj iTeixpantijkauan Jehová? (6)
1. Tekitl tlen kichiuaj iteixpantijkauan Jehová opeuj ipan xiuitl 1870. Kachtopa notokayotiayaj Nomachtijkej itech Biblia, san ika ipan 1931 onotokayotijkej iteixpantijkauan Jehová ken uajnestiuj ipan Biblia (Isaías 43:10). Ijkuak opeujkej xmiyekej katka, niman aman nemij millones Teixpantijkej akin tenojnotsa ipan doscientos treinta países.
2. Nochimej iteixpantijkauan Jehová nosentlaliaj yexpa ipan se semana. Timitsyoleuaj imiuan xmosentlali (Hebreos 10:24, 25). Tlen ompa temachtiaj nokixtia ipan Biblia. Peua niman tlami ika teoyotl, niman noijki nokuikatiaj ika nochi inyojlo niman ijkon kiueyichiuaj Jehová (Efesios 5:18, 19). Xnotlaxtlaua niman xnotlajtlani tomin (Mateo 10:8).
3. Nochimej nonechikoaj ipan Kajli kampa nosentlaliaj iteixpantijkauan Jehová. Kaltin kampa nosentlaliaj iTeixpantijkauan Jehová, san yejuamej kinchijchiuaj ika nochi inyojlo pampa xkintlaxtlauiliaj. Ompa xtikitas tajtsitsintin, cruces nion itlaj okse. Nochi notlaxtlaua ika tomin tlen kitemakaj ika nochi inyojlo. Akin kinekij kitlaliskej tomin uelis kontlakaliskej ipan se cajita kampa nosentlalia tomin (2 Corintios 9:7).
4. Nochiuiyan kampa nosentlaliaj nemij tlayekankej, noso ancianos. Yejuamej tlayekana niman temachtiaj (1 Timoteo 3:1-7; 5:17). Nemij tlapaleuijkej noso siervos ministeriales akin tepaleuiaj (1 Timoteo 3:8-10, 12, 13). Xakaj ueyixtika kampa nosentlaliaj (2 Corintios 1:24). Xkiseliaj se tokayotl tlen ika noueyimatiskej (Mateo 23:8-10). Xnotlakentiaj tlamantik noso sejneka. Nion xkintlaxtlauiliaj ika intekiyo. Tlayekankej ika nochi inyojlo kinchikauiliaj intlaneltokil akin ompa nosentlaliaj. Teyolchikauaj niman teijliaj tlenon nochiuas ijkuak se kipiya tlauejli (Santiago 5:14-16; 1 Pedro 5:2, 3).
5. Iteixpantijkauan Jehová noijki kipiyaj uejueyimej nechikoltin sejsexipan. Ipan on tonajli nosentlaliaj miyekej tokniuan niman kikakij tlamachtijli sajnoye kuajli tlen ualeua itech Biblia. Ipan on uejueyimej nechikoltin nochipa miyekej yenkuikej tlaneltokakej noapolaktiaj (Mateo 3:13-17; 28:19, 20).
6. Kajli sajnoye ueyi kampa noyekana tekitl tlen kichiuaj iTeixpantijkauan Jehová onka Nueva York. Ompa nemij san sekimej tlayekankej akin kipiyaj tlamachilistli niman kiyekanaj kampa nosentlaliaj nochiuiyan ipan tlaltikpaktli. Niman noijki, onka kanaj cien uejueyimej kaltin nochiuiyan in tlaltikpaktli. Akin ompa nemij, kinchijchiuaj amamej tlen temachtia itech Biblia niman kontetitlaniliaj; tekitij ika nochi inyojlo maski xkintlaxtlauiliaj. Ompa kitstokej kenon tenojnotsaj. ¿Tleka xtikyejyekoa tiauj tikonta se ueyi kajli onka nisiu kampa tichanti?