ToTajtsin techyoleua iuan matouikakan

ToTajtsin kineki iuan matouikakan. ¿Tikmatiya ika uelis timouikas iuan akin sajnoye ueyixtika ipan iluikak niman tlaltikpaktli? Abraham, akin yeuejkaui nemiya, okixmatkej kentla akin iuan nouikaya toTajtsin (Santiago 2:23).ʼ Niman Abraham okitokayotijkej itetlajsojkau Dios”. Biblia tlajtoa itech sekimej tlakamej niman siuamej akin noijki iuan onouikakej toTajtsin niman okiselijkej ueyi tlateochiualismej. Ipan in tonaltin miyekej tlaltikpakchanejkej kuajli iuan nouikaj toTajtsin. Tejua noijki uelis iuan timouikas.

Timouikas iuan toTajtsin okachi kuajli maka ken iuan se tlaltikpakchane. ToTajtsin xkeman kinkaua akin iuan nouikaj, tla noijki xkikauaj (Hebreos 13:5). Timouikas iuan toTajtsin okachi kuajli maka ken tikpiyas miyek tomin. Ijkuak mikij akin kipiyaj tomin oksekimej ika nokauaj intomin. Niman, akin kuajli nouikaj iuan toTajtsin kipiyaj tlen melak patio akin xakaj uelis kinkuilis (Mateo 6:19).

Kanaj nemij akinomej xkinekij xmomachti tlen toTajtsin temachtia. Akin kichiuaj yejuin uelis yeskej akin imiuan timouika noso mochanejkauan (Mateo 10:36, 37). Tla yakaj mitsueuetskilia noso mitsmojtia, xmotlajtolti: “¿Akinon nikneki nikpaktis, tlakamej noso toTajtsin?”. Xnemili: tla yakaj mitsijliskia maka xtlakua, ¿tikchiuaskia? Ka. Tla tiknekij tinemiskej kipiya ika titlakuaskej. Aman tej, toTajtsin uelis kichiuas xnemi nochipa. Ika on, xmomachti kenon uelis timouikas iuan toTajtsin, niman maka xmokauili itlaj mamistsakuili (Juan 17:3).