Matikmapeuakan tlaneltokijli tlen xmelauak

Satanás iuan xkuakualtin espíritus xkinekij matiktekichiuilikan toTajtsin. Kiyejyekoaj kintsinkixtiskej itech toTajtsin kech yejuamej ueliskej. ¿Kenon? Kikuij tlaneltokijli tlen xmelauak (2 Corintios 11:13-15). Tlaneltokijli tlen xmelauak xtemachtia tlen melauak kijtoa Biblia. Tlaneltokijli xmelauak kentla tomin tlen teixkajkayaua: uelis nesis melauak tomin, noijki ijkon tlaneltokijli xmelauak. Uelis techuajkuilis miyek tlauejli.

Tlaneltokiltin xmelajkej xuelis kipaktis Jehová, akin kijtoa tlen melauak. Ijkuak Jesús nemiya ipan tlaltikpaktli, teopixkej kinekiyaj kimiktiskej. Kinemiliayaj ika kuajli kiueyichiujtoyaj toTajtsin. Kijtoayaj: “San se tajtli tikpiaj niman on yejua Dios”. ¿Ijkon kinemiliaya Jesús? Ka. Yejua otlanankili: “Nemejuamej nemotaj yejua on diablo” (Juan 8:41, 44). Ipan in tonajli, miyekej tlaltikpakchanejkej kinemiliaj ika kiueyichiujtokej toTajtsin, san ika yejon xmelak, kitekichiuilitojkej Satanás iuan xkuakualtin espíritus (1 Corintios 10:20).

Ijkon ken se kojtlakilyotl palanki xkuajli tlatlakiltia, noijki xmelauak tlaneltokijli kichiua tlaltikpakchanejkej manochiuakan xkuakualtin. Tlaltikpaktli tentika ika tlauejli pampa tlaltikpakchanejkej xkuajli tlen kichiuaj. Nemij akin siuapapatlaj, tlakapapatlaj, nouisokij, tlachtekij, temiktiaj, tlajyouiaj, niman okseki tlemach. Miyekej tlaltikpakchanejkej tlen kichiuaj yejuin, kipiyaj tlen ipan tlaneltokaj, san ika tlen kineltokaj xkiminmapeua makichiuakan tlen kuajli. Xuelis iuan nouikaskej toTajtsin tla xkipatlaj tlen xkuajli kichiuaj (Mateo 7:17, 18).

Tlaneltokijli tlen xmelauak temachtia matikinchiuilikan teoyotl tajtsitsintin. ToTajtsin kijtoa maka matikinchiuilikan teoyotl tajtsitsintin. ¿Tleka? ¿Tikuelitaskia maka yakaj keman mouan matlajto niman kema iuan matlajto motlaixkopinal? ¿Uelis iuan timouikas? Ka. Jehová kineki yejua makinotsakan, maka se tlamachichiuajli noso tajtsitsintin tlen xyoltokej (1 Corintios 10:14).

Tlaneltokijli tlen xmelauak kiteititia ika uelis titemiktis tla onka guerras. Jesús okijto ika akin iuan nouikaj toTajtsin notlasojtlaskiaj se iuan okse. Xtikiminmiktiaj akin tikimintlasojtlaj (Juan 13:35). Niman maski maka makuakualtin tlaltikpakchanejkej xtikiminmiktiskej. Ijkuak itlauelikniuan Jesús okasike, yejua xokinkauili inomachtijkauan mateuisokikan ipampa (Mateo 26:51, 52).

Tlaneltokijli xmelauak temachtia ika ijkuak timikis titlatlatos nochipa. Tlajtlakojli notlaxtlaua ika mikilistli, ijkon temachtia Biblia (Romanos 6:23). Jehová se toTajtsin tetlasojtlani. Tla Jehová tetlasojtla, ¿tetlajyouiltiskia ijkon? ¡Ka! Ipan Xochitlalpan, san kiueyichiuaskej Jehová ken yejua kuelita (Apocalipsis 15:4). Nochimej tlaneltokiltin tlen temachtiaj itlakakayaualisuan Satanás popoliuiskej.