TLAMACHTIJLI 13
ToTajtsin xkuelita tlen kichiuaj religiones tlen xmelajkej
Miyek religiones kijtouaj ika kitekichiuiliaj toTajtsin niman ika tetlasojtlaj ijkon ken yejua tetlasojtla. San ika ¿tleka kichiuaj tlen melak xkuajli? Pampa yejon religiones xmelauak kitekichiuiliaj toTajtsin. Yejuamej san tekajkayauaj niman yokitlajtolchijchiuilijkej toTajtsin. ¿Tlenon yokiteneuilijkej? ¿Tlenon kinemilia Jehová itech yejon religiones? ¿Niman tlenon inpan nochiuas?
1. ¿Tlenon yotemachtijkej religiones tlen xmelajkej?
Religiones tlen xmelajkej xkijtouaj tlen melauak itech toTajtsin (Romanos 1:25). Miyek religiones xkiteijliaj kenijki itoka toTajtsin. San ika, Biblia techijlia ika toTajtsin kineki matiknotsakan ika itoka (Romanos 10:13, 14, TNM). Miyek religiones temachtiaj ika toTajtsin kichiua mapano tlen xkuajli, san ika, yejon xmelauak. Yejua xkeman kichiua tlen xkuajli (xkita Job 34:12). Miyekej yokitlalkauijkej toTajtsin pampa yokineltokakej tlen temachtiaj religiones tlen xmelajkej.
2. ¿Tlenon yokichiujkej religiones tlen xmelajkej?
Religiones tlen xmelajkej xtetlasojtlaj ijkon ken Jehová tetlasojtla. Biblia kijtoua ika yejuamej “tlajtlakouaj hasta kampa xok ueli” (Apocalipsis 18:5). Desde yeuejkaui, miyek religiones nokalaktiaj ipan política, tlapaleuiyaj ipan guerras niman melak yotemiktijkej. Miyekej akin tlayekanaj ipan religiones melak yonotomintijkej pampa kinchiualtiaj akin yauej ipan inreligión makinmakakan tomin. Nochi yejuin techititia ika yejuamej nion xkixmatij toTajtsin. Yejuamej xkichiuaj tlen toTajtsin kineki (xkita 1 Juan 4:8).
3. ¿Tlenon kinemilia Jehová itech religiones tlen xmelajkej?
Tla tejua xtikuelita tlen kichiuaj religiones tlen xmelajkej, ¡san xkonnemili kenijki nomachilia toTajtsin! Yejua melak tetlasojtla, san ika, melak kikualaniaj akin tlayekanaj ipan religiones pampa temachtiaj tlen xmelauak niman pampa melak xkuajli tlen kinchiuiliaj akin nemij ipan yejon religiones. ToTajtsin yokijto ika kinpopolos nochi religiones tlen xmelajkej niman ika xok keman tikimitaskej (Apocalipsis 18:21). Sa achijtsin poliui ijkuak xok onias nion se religión tlen xmelauak (Apocalipsis 18:8).
OKSEKI XKASIKAMATI
Más kuajli matikitakan tlenon kinemilia Jehová itech religiones tlen xmelajkej niman nochi tlen yokichiujkej yejon religiones. Noijki matikitakan tleka yejon xnoneki mitsteltis maka sa xmomachti itech Jehová.
4. ToTajtsin xkinselia nochi religiones
Miyekej kijtouaj ika nochi religiones mitspaleuiskej xmouika iuan toTajtsin, san ika ¿yejon melauak? Xkitakan Mateo 7:13, 14 (TNM), niman xtlajtokan itech yejuin:
Ijkon ken kijtoua Biblia, ¿kenijki yejon ojtli tlen teuika ipan nemilistli?
Xkitakan VIDEO niman xtlajtokan itech yejuin:
¿Temachtia Biblia ika toTajtsin kinselia miyek religiones?
5. Religiones tlen xmelajkej xtetlasojtlaj ijkon ken toTajtsin tetlasojtla
Miyek religiones kijtouaj ika kitlakamatij toTajtsin, san ika, yonokalaktijkej ipan guerras niman yokichiujkej tlen xkuajli. Xkitakan VIDEO niman xtlajtokan itech yejuin:
¿Tlenon okichiujkej religiones ijkuak opanok ika Okpa Guerra ipan nochi tlaltikpaktli?
¿Tlenon tiknemilia itech tlen okichiujkej?
Xkitakan Juan 13:34, 35 niman 17:16. Aman xtlajtokan itech yejuin:
¿Kenijki tiknemilia nomachilia Jehová ijkuak kita ika religiones nokalaktiaj ipan guerras?
Religiones tlen xmelajkej yokichiujkej tlen xkuajli niman xtetlasojtlaj ijkon ken toTajtsin tetlasojtla. ¿Uelis tikijtos tlenon yotikitak yokichiujkej religiones?
Religiones tlen xmelajkej xtetlasojtlaj ijkon ken toTajtsin tetlasojtla.
6. ToTajtsin xkineki matinemikan ipan religiones tlen xmelajkej
Xkitakan Apocalipsis 18:4a niman xtlajtokan itech yejuin:
Miyekej nemij ipan religiones tlen xmelajkej niman melak yokinkajkayaujkej. San ika, toTajtsin kineki kinpaleuis makisakan itech yejon religiones. ¿Tlenon tiknemilia itech yejuin?
7. Más xkixmati toTajtsin
Miyekej xok kinekij kixmatiskej toTajtsin pampa yokitakej tlen xkuajli kichiuaj religiones tlen xmelajkej. San ika ¿kuajli yeskia tla tejuamej noijki ijkon tikchiuaj? Xkonnemili ika se telpochtli xkineki kitlakamatis itaj. Ika yejon, kisa de ichan niman peua kichiua tlen melak xkuajli. Itaj yejon telpochtli xkuelita tlen kichiujtinemi ikoneuj. ¿Tiknemilia ika kuajli yeskia tla tiktlajtlakoltiaj yejon tajtli ipampa tlen kichiujtinemi ikoneuj?
Aman ika yotikonteneujkej yejuin, ¿kuajli yeskia tla tiktlalkauiyaj Jehová noso tiktlajtlakoltiaj ipampa tlen kichiuaj religiones tlen xmelajkej?
SEKIMEJ KIJTOUAJ: “Uelis tinemis ipan san katlejua religión. Nochimej temachtiaj tlen kuajli”.
¿Tejua noijki ijkon tiknemilia?
Maski miyek religiones kijtouaj ika temachtiaj tlen kuajli, ¿tleka toTajtsin xnochimej kinselia?
TLEN OTIUEL
Miyek religiones yokijtokej tlen xmelauak itech toTajtsin niman yokichiujkej tlen melak xkuajli. Sa achijtsin poliui ijkuak toTajtsin kinpopolos.
¿Kenon titlanankiliskia?
¿Tlenon tiknemilia itech tlen yokichiujkej niman yotemachtijkej religiones tlen xmelajkej?
¿Tlenon kinemilia Jehová itech religiones tlen xmelajkej?
¿Tlenon kinchiuilis toTajtsin religiones tlen xmelajkej?
OKSEKI XKITA
Miyek religiones kichiuaj tlen toTajtsin xkuelita. Xkita tleka ijkon tikijtouaj.
“¿Nochi religiones techpaleuiyaj matouikakan iuan toTajtsin?” (Tlamachtijli de jw.org)
¿Tleka toTajtsin kineki matosentlalikan niman ijkon matikueyichiuakan?
“¿Noneki tinemiskej ipan se religión?” (Tlamachtijli de jw.org)
Se teopixki okitak ika ireligión xtemachtiaya tlen melauak, ika yejon, más opeuj nomachtia Biblia niman ijkon kimatis tlen melauak itech toTajtsin.
“Se teopixki kikaua ireligión” (¡Xtlachiakan!, febrero de 2015)
Desde yeuejkaui, religiones temachtiaj ika toTajtsin xtechtlasojtla niman xtechiknelia. Xkita tleka ijkon opeujkej temachtiaj.
“Tlen miyekej yokiteneuilijkej toTajtsin” (Amatl Tekakistilijketl, 1 de noviembre de 2013)