Tlakuikaltin tlen techmachtiaj niman techyolchikauaj

AMOXTLI ipan Biblia tlen melak ueyak ijkuiliujtok, tlajtouaj itech tlakuikaltin tlen kiueyichiuaj Jehová niman tlen onosentlali kanaj ipan mil xiuitl. Akin okimijkuilojkej ika kualtsitsintin tlajtoltin okitlalijkej kech ueyi intlaneltokil kipiayaj. Noijki okijkuilojkej tlen tlaltikpakchanejkej kimachiliaj, ken pakilistli niman tekokojkayotl, tlasojkamachilistli, ken ijkuak noyolkuepaj niman ijkuak noyolkokouaj. Nochimej yejon tlakamej kitlasojtlayaj toTajtsin niman kuajli iuan nouikayaj. Matikitakan san seki tlen onoijkuilo ipan amoxtli Salmos.

Jehová, akin kinamiki san yejua tlayekanas ipan nochi tlen onka, noneki tikueyichiuaskej. Salmo 83:18 kijtoua: “Tejua motoka Jehová, san tejua tiUeyixtika ipan nochi tlaltikpaktli”. Miyek salmos kiueyichiuaj Jehová pampa okichijchiuj iluikak, sitlalimej, okitlali nemilistli ipan tlaltikpaktli niman okichijchiuj tlaltikpakchane (Salmos 8, 19, 139 niman 148). Miyekej kiueyichiuaj, pampa kintlajpiya niman kiminmakixtia akin xkeman kikauaj (Salmos 18, 97 niman 138). Oksekimej kikuikatlaliliaj pampa toTajtsin yolmelaujki niman kimpaleuiya akin kuajli nouikaj niman kimpopoloua akin xkuakualtin (Salmos 11, 68 niman 146).

Jehová kimpaleuiya niman kinyolchikaua akin kitlasojtlaj. Uelis tikijtoskej ika salmo 23 melak miyekej kixmatstokej, kampa David kiteneua toTajtsin kentla se tlajpixketl akin kintlasojtla, kinyekana niman kintlajpiya iborreguitos. Ipan Salmo 65:2 techilnamiktia ika Jehová “kinkaki toteoyouan”. Noijki akin okichiujkej miyek tlen xkuajli yokinyolchikauj Salmos 39 niman 51. Ompa, David okijkuilo ika melak noyolkokouaya pampa miyekpa otlajtlako niman kuajli kimatstoya ika toTajtsin kitlapopoluis. Niman ipan Salmo 55:22 techyoleua matikneltokakan ika Jehová techpaleuis niman matikauilikan matechpaleui ika totlajyouilisuan.

Jehová kiyektlalis nochi tlen onka ipan tlaltikpaktli ika iTekiuajyo Mesías. Ipan Salmos miyekan kiteneua Mesías, Tekiuaj akin yonoijtoka uajlas. Ipan Salmo 2 kijtoua ika yejon Tekiuaj kipopolos tekiuajyomej akin kixnamikiskej. Ipan Salmo 72 kijtoua ika kichiuas maka sa maonia apistli, niman maka manochiua nochi tlen xkuajli. Ipan Salmo 46: 9, noijki kijtoua ika iTekiuajyo Mesías, toTajtsin kipopolos guerras niman nochi tlen ika nomiktilo. Noijki ipan Salmo 37 kijtoua xok nemiskej tlaltikpakchanejkej xkuakualtin niman san akin yolmelaujkej nemiskej nochipa ika inyojlo niman ika yolseuilistli ipan tlaltikpaktli.

(Onokixti itech amoxtli Salmos.)