Yoliui Jesús

IJKUAK yopanoka yeyi tonajli ika miktoya Cristo, sekimej siuamej akin inomachtijkauan katkaj, oyajkej kampa teostotl niman okinextitoj tlapoujtikaj. Yakaj okejkuani tetl tlen ika tentsaujtoya teostotl, niman ijtik xok yakaj ompa nemiya.

Kuakon omemej iluikaktekitkej onoteititijkej imixpan siuamej. Se okimijli: “Nenkitejtemouaj Jesús on yejuan ualeua Nazaret [...] aman yoyoliu” (Marcos 16:6). Nimantsin, siuamej onotlalojkej niman okimijlitoj itlatitlankauan Jesús. Ipan ojtli okinextijkej Jesús, niman okimijli: “Ma ka xmomojtikan. Xuiyan, xkinmachiltitij nokniuan ma uiyan ne Galilea, niman ompa nechitaskej” (Mateo 28:10).

Ipan yejon teotlak, ijkuak omemej inomachtijkauan tlen ualeuayaj Jerusalén niman yayaj ipan kalpan Emaús, okiminisiuij se tlakatl akin xkixmatiyaj niman okimintlajtoltij itech tlenon tlajtouayaj. Yejon tlakatl Jesús katka, san ika yejuamej xokixmatkej pampa xijkon tlachiaya. Melak noyolkokouayaj ijkuak okinankilijkej ika uajtlajtotiayaj itech inTemachtijkauj, kuakon yejuin tlakatl opeuj kimintomilia itech nochi Tlajkuiloltin tlen tlajtouayaj itech Mesías. Ipan Jesús onochiuj nochi tlen yonoijtoka itech Mesías.a Ijkuak okitakej ika tlajtouayaj iuan Cristo akin yokiyolitijkaj tlen aman katka se espíritu, nimantsin opopoliuj.

Nimantsin yejon omemej inomachtijkauan onokuepkej Jerusalén kampa okiminextijtasikej itlatitlankauan Jesús ijtik se kajli tlen kuajli tsaujtoya. Ijkuak kimijlitoyaj tlen iminpan onochiuj, nochimej akin ompa nemiyaj onomojkaitakej ijkuak imixpan oksejpa onoteititi Jesús. “¿Tleka nenkauiliaj on ometlamatilistli [ma]kalaki ipan nemoyojlo?”, okimintlajtoltij. Niman okimijli: “Ijkin tlajkuilolnestikaj, ika Cristo [...] mikis, niman ipan yeyi tonajli yoliuis” (Lucas 24:38, 46).

Ipan cuarenta tonaltin, Jesús onoteititi miyekpa. Se tonajli, okitakej kanaj quinientas tlaltikpakchanejkej. Kanaj ipan yejon tonajli okimijli inomachtijkauan makichiuakan yejuin ueyi tekitl: “Xuiyan [...] niman xkinmachtikan nochimej on tlakamej para yejuamej no nonomachtijkauan yeskej. [...] xkinmachtikan para ma kitlakamatikan nochi tlen yonemechnauatij. Niman xmatikan ika nejua mojmostla nemouan ninemi hasta ijkuak tlatlalpoliuis” (Mateo 28:19, 20).

Ijkuak Jesús sa sejpa onosentlali imiuan majtlaktli iuan se itlatitlankauan akin xonoxelojkej itech, okimijli: “Ijkuak on Espíritu Santo uajlas nemopan, nenkiseliskej on poder. Niman nennechteixpantiliskej [...] nochiuiyan ipan in tlaltikpaktli” (Hechos 1:8). Kuakon opeuj tlejkoua iluikak niman se moxtli okitlapacho niman xok ouel okitakej.

(Onokixti itech Mateo itlaxelol ueyi 28, Marcos 16, Lucas 24, Juan 20 niman 21, niman 1 Corintios 15:5, 6.)