Jesús okijto tlen noijki nochiuaskia ipan yejuin tonaltin

NEMIYA ipan tepetl itoka Olivos, kampa kualtsin nesiya teopan tlen onkatka ipan Jerusalén, niman nauimej itlatitlankauan Jesús okichtakatlajtoltijkej, tlenon okijtosnek itech tlen okiminojnotska. Kemach yokijtoka ika teopan kixoxotoniskej, niman noijki yotlajtoka “ika sa achijtsin poliuis ijkuak tlamis tlajtlamach ken nochiua ipan tlaltikpaktli” (Mateo 13:40, 49, NM). Kuakon okitlajtoltijkej: “¿Kemanon nochiuas yejuin tlemach, niman tlenon panotos ijkuak tikiminualitstos tlaltikpakchanejkej niman ika sa achijtsin poliuis ijkuak tlamis tlajtlamach ken nochiua ipan tlaltikpaktli?” (Mateo 24:3, NM).

Ijkuak Jesús okiminankili, okimijli tlenon panoskia ijkuak sa achijtsin poliuiskia niman kixoxotoniskiaj Jerusalén iuan teopan tlen ompa onkatka. San ika, tlen okijto panoskia ipan Jerusalén, sakin noijki nochiuaskia ipan nochi tlaltikpaktli. Tla kinekij kimatiskej tlaltikpakchanejkej kemanon Jesús kiminualistoskia, nonekiskia matlatlachixtokan itech nochi tlajtlamach tlen panotos nochiuiyan ipan tlaltikpaktli. Yejon tlen panotoskiaj, kijtosnekis ika Jehová yokitlali Jesús kentla Tekiuaj itech Tekiuajyotl tlen xuejkaujtipan panos ijkuak kipopolos nochi tlen xkuajli nochiua niman kichiuas oksejpa maonia yolseuilistli ipan nochi tlaltikpaktli. Ijkuak nochiuaskia tlen Jesús okijto panoskia, kijtosnekiskia ika tlamis tlajtlamach ken nochiua ipan tlaltikpaktli —ika política, tlaneltokilistin niman ken nemij tlaltikpakchanejkej— kuakon peuas nemilos ken toTajtsin kineki.

Jesús okijto ika ijkuak peuas tekiuajtis ipan iluikak, ipan nochiuiyan tlaltikpaktli onias guerras, apistli, tlalolinalistli niman kokolistin tlen nosemoyauaj. Ika yolik xok notlakamatiskia tlanauatiltin. Niman akin yemelak kichiuaskiaj ken Cristo teijliskiaj kuajli tlajtoltin itech iTekiuajyo toTajtsin. Tlen okijto Jesús panoskia, tlamiskia ika “sanoyej miyek [...] tlajyouilistli” melak temomojti, tlen xkeman nochiua ipan tlaltikpaktli (Mateo 24:21).

¿Kenon kimatiskiaj akin yemelak kichiuaj ken Cristo ika iyejkotoskia yejon tonajli? Jesús okimijli inomachtijkauan: “Xkitakan on kojtlakilyotl itoka higuera” (Lucas 21:29). Ijkuak se higuera peua xiujyokisa, tikmatstokej ika iyejkotika xopantlaj. Noijki ijkon, ijkuak nochi panotoskia ken Jesús okijto, tikmatiskiaj ika yejon tonajli ijkuak yejua tlapopolos ipan tlaltikpaktli, iyejkotika. Aman, Jesús okijto ika san iTaj kimati kemanon peuaskia onias sajnoye miyek tlajyouilistli. Ika yejon okijto: ‘Xtlatlachixtokan niman xchiuakan oración, pampa xnenkimatij kemanon yejkos on tonajliʼ (Marcos 13:33).

(Onokixti itech Mateo itlaxeloluan uejueyimej 24 niman 25 , Marcos 13 niman Lucas 21.)