Tlaltikpaktli oksejpa nochiua se xochitlalpan

AMOXTLI tlen ika ontlami Biblia —Revelación, noso Apocalipsis— kichiua tlaltikpakchanejkej makipiyakan tlamachialistli. Okijkuilo Juan itlatitlankauj Jesús, kipiya miyek tlatlachalismej tlen nochiuas ika tlayekapan niman ontlamis ijkuak nochiuas tlen toTajtsin kineki mapano.

Ipan kachtopa tlatlachalistli, Jesús akin yokiyolitijkej kinyolchikaua niman kinyektlalia miyekej tlanechikoltin. Ipan okse tlatlachalistli techijlia kenon onka kampa tlanauatia toTajtsin niman noita iluikaktekitkej kiueyichiujtokej Jehová.

Ijkuak sa achijtsin poliuis niman nochiuas tlen toTajtsin kineki, Borreguito (Jesucristo) kiselia se tlajkuilojli tlen kipiya chikome sellos. Ijkuak kitlapoua naui sellos, noita nauimej akin yayaj ipan incaballos. Kachtopa noita Jesús, akin yokitlalijkej kentla Tekiuaj niman tlejkotiuj ipan se caballo istak. Oksekimej tlejkotiuej ipan caballos tlen tlatlamantikej noso sesejneka tlachiaj intlapalyo, yejuin kijtosneki guerra, apistli niman kokolistin tlen nosemoyauaj, nochi yejuin panos ijkuak sa achijtsin poliuis ijkuak tlamis tlajtlamach ken nochiua ipan tlaltikpaktli. Ijkuak kitlapouaj sello tlen ika ontlami, nokaki kipitsaj chikome trompetas, kijtosneki tlen toTajtsin kichiuas. Niman nochiua okseki chikome tlajyouilistin, ijkon kiteititia itlauel toTajtsin.

Aman, Juan kita tlakati se konetsintli, yejuin kijtosneki iTekiuajyo toTajtsin tlen okitlalijkej iluikak. Peua se guerra, niman Satanás iuan xkuakualtin espíritus kinuajkixtiaj iluikak niman kinuajtlajkalij ipan tlaltikpaktli. Kuakon kakisti se tlajtojli chikauak tlen kijtoua: “Lástima para nemejuamej yejuan nenchanejkej ipan tlaltikpaktli”. ¿Tleka? Pampa Diablo kimatstok ika sa achijtsin poliui ijkuak kipopoloskej, melak kualantika (Apocalipsis 12:12).

Oksejpa Juan kita Jesús ken se borreguito niman inakastlan nemij 144,000 tlaltikpakchanejkej akin yokintlapejpenijkej “iuan Cristo tekiuajtiskej”. Ipan Apocalipsis teasikamachiltia ika 144,000 tlaltikpakchanejkej, yejuamej noijki oksekimej ikoneuan siuatl akin tekitiskej iuan Jesús (Apocalipsis 14:1; 20:6).

Sakin, tlanauatijkej ipan tlaltikpaktli nosentlaliaj ipan Armagedón, noso kampa “nouijsokiskej iuan Dios ipan on iueyitonal Dios yejuan nochi ueli”, niman kixnamikij akin tlejkotiuj ipan caballo istak, Jesús, niman iiluikaktekitkauan. ¿Kenon ontlamis yejuin guerra? Tlanauatijkej kimpopoloskej niman Satanás kitsakuaskej. Jesús iuan 144,000, tekiuajtij ipan tlaltikpaktli mil xiujtin, niman ijkuak ontlamiskej yejon xiujtin, Satanás noijki kipopoloskej (Apocalipsis 16:14; 20:4).

¿Tlenon kichiuas iTekiuajyo Mesías inpampa tlaltikpakchanejkej tetlakamatkej? Juan kijkuiloua: “[Jehová] kimpopolouilis nochi ajmantli, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok” (Apocalipsis 21:4). Kema, ¡tlaltikpaktli oksejpa nochiuas se xochitlalpan!

Ijkon, amoxtli Apocalipsis ontlami kijtoua tlen techijlia Biblia: ika iTekiuajyo Mesías, Jehová kichipauas itokayo niman ijkon nochi kimatiskej ika san yejua kimelaua tlanauatis.

(Onokixti itech amoxtli Apocalipsis.)