Rahab okineltokak Jehová

Xnemili ika tinemi ipan ueyikalpan Jericó. Yejuin nokaua ipan Canaán, akin ompa chantij xkineltokaj Jehová. Se siuatl akin itoka Rahab noijki ompa chanti.

Ijkuak Rahab pitentsin katka, okinojnotskej kenon Moisés okitlajkoxelo mar rojo niman kenon okinkixti israelitas itech Egipto. Yokitekakilijka kenon Jehová okinpaleui israelitas makintlanikan akin kintlauelitayaj. ¡Aman okitekakili ika israelitas sa nisiu nemiyaj itech Jericó!

Se tonajli, omemej israelitas oichtakatlachiatoj ika tlayoua ipan Jericó. Yejuin tlakamej oajsikej ichan Rahab. Okintlajtlanili manokauakan ichan. Ipan yejon yeuajli, tekiuaj ipan Jericó okimat ika yokalajkaj sekimej ichtakatlachixkej ipan ueyikalpan niman ika nemiyaj ichan Rahab. Kuakon, tekiuaj otlatitlan makimanatij. Rahab okimiyan akin oichtakatlachiatoj tlakpak ipan ikal niman akin okintitlan tekiuaj okimijli: “Tlakamej akin oichtakatlachiakoj, nikan nemiyaj, san ika, aman yokiskej itech yejuin ueyikalpan. ¡Tla nemotlajtlalouaj, nenkimajsiskej!”. ¿Tikmatstika tleka Rahab okimiyan akin oichtakatlachiatoj ipan Jericó?... Pampa kineltokaya Jehová niman kimatstoya ika Jehová kinmakaskia Canaán.

Ijkuak akin oichtakatlachiatoj ok xkisayaj ichan, okijlikej Rahab ika xmikiskia iuan ichanejkauan ijkuak kixoxotoniskiaj Jericó. ¿Tikmatstika tlenon nonekiya kichiuas Rahab?... Akin oichtakatlachiatoj okijlikej: “Mej yejuin mekatl chichiltik, niman xpilo ipan moventana. Tla ijkon tikchiua, nochimej akin nemiskej mokalijtik xmikiskej.” Rahab ijkon okichiuj ken okijlikej. ¿Tikmatstika tlenon opanok sakin?...

Ijkuak yopanoka seki tonaltin, israelitas onejnenkej iyeualiujyan Jericó, san ika, xakaj tsajtsiya. Chikuasen tonajli ijkon okichiujkej, san sejpa ipan se tonajli tlayeualouayaj. San ika, ijkuak oajsik chikome tonajli, chikometipan okiyeualojkej ueyikalpan. Kuakon, nochimej san sekan chikauak otsajtsikej. Jehová okichiuj ika itepanuan Jericó maxoxotonikan. San ika, kajli kampa pilkak mekatl chichiltik ipan ventana, ¡xtlaj okichiuj! ¿Yotikitak kanon pilkatok yejon mekatl?... ¡Rahab niman ichanejkauan xomijkej!

¿Tlenon tiuelij itech Rahab?... Rahab okikak tlemach tlen kuajli okichiuj Jehová niman okineltokak. Tejua noijki miyek timomachtijtika tlen kuajli okichiuj Jehová. ¿Tikchiuas ijkon ken Rahab?... ¡Tikmatstokej ika ijkon tikchiuas!