TLAMACHTIJLI 30

Rahab okimiyan ichtakatlachixkej

Ijkuak ichtakatlachixkej israelitas oyajkej ueyikalpan Jericó, onokaujkej ichan se siuatl itoka katka Rahab. Ijkuak tekiuaj itech Jericó okimat, okintitlan isoldados ichan Rahab. Yejua okimiyan ichtakatlachixkej ikuatipan ichan niman oksekan okintitlan soldados. Rahab okimijli ichtakatlachixkej: “Nimechpaleuis pampa nikmati ika Jehová nemouan nemi niman ika nemotlatkitiskej yejuin tlajli. Nimechtlajtlanilia xnechijlikan ika nenkimakixtiskej nochanejkauan”.

Ichtakatlachixkej okijlikej Rahab: “Tla tiksaloua yejuin mekatl chichiltik ipan moventana, timitsijliaj ika xtlaj inpan nochiuas akin nemiskej mochan. Ijkon mochanejkauan makisaskej”.

Ikal Rahab, tlen kipiaya se mekatl chichiltik tlen saliujtok ipan ventana xouets maski itepanuan Jericó ouetskej

Rahab kinkauilia ichtakatlachixkej matemokan ipan iventana ika se mekatl. Yeyi tonajli oniyankej ipan tepemej, sakin onokuepkej kampa Josué. Kuakon israelitas okipanauijkej atentli Jordán niman onoyektlalijkej niman ijkon notlatkitiskiaj tlajli. Jericó kachtopa ueyikalpan tlen onotlatkitijkej. Jehová okimijli ika chikuasen tonajli makiyeualokan ueyikalpan, san sejpa ipan se tonajli. Ipan tonajli chikome, yejuamej chikometipan okiyeualojkej ueyikalpan. Teopixkej okinpitskej intrompetas, niman soldados melak chikauak otsajtsikej. ¡Itepanuan ueyikalpan oxoxotonkej! Maski ikal Rahab ompa onkatka, xouets. Rahab niman ichanejkauan omakiskej pampa yejua otlaneltokak itech Jehová.

“Noijki onochiu itech on siuatl itoka Rahab [...]. Yejua kuajli okinselij on yejuan Josué okintitlan para kitaskej kenijki tlaojonkaj ne ueyikan Jericó, niman no yejua okimpaleuij para ocholojkej ijkuak ualajtikatkaj intlauelikniuan. Yejua ika Dios okijtoj ika itlajtlakoluan yokintlaxtlau” (Santiago 2:25).