Yejuin tlakamej otlajkuilojkej itech Jesús

¿Tikimita yejuin tlakamej ipan tlaixkopinajli?... Yejuamej intoka Mateo, Marcos, Lucas, Juan, Pedro, Santiago, Judas niman Pablo. Yejuin tlakamej onenkej ijkuak Jesús onen niman otlajkuilojkej itech yejua. Matiuelikan itech yejuamej.

Yeyimej itech yejuin tlakamej katkaj itlatitlankauan noso iapóstoles Jesús akin imiuan otenojnots. ¿Tikmatstika akinomej katkaj?... Mateo, Juan niman pedro. Mateo niman Juan melak kuajli okixmatkej Jesús, niman okijkuilojkej kenon onen Jesús ipan tlaltikpaktli. Juan noijki okijkuilo se amoxtli tlen itoka Apocalipsis (noso Revelación) niman yeyi amatlajkuilojli tlen noixmatij ken Primera, Segunda niman Tercera de Juan. Pedro okijkuilo ome amatlajkuilojli tlen onka ipan Biblia, tlen noixmatij ken Primera niman Segunda de Pedro. Ipan segunda de Pedro ijkuiliujtok ijkuak ouajtlajto Jehová iluikak niman okijto itech Jesús: “Yejuin yejua nokoneuj. Nejua melak niktlasojtla niman melak nechyolpaktia.”

Oksekimej tlakamej akin nesij ipan tlaixkopinajli noijki otemachtijkej itech Jesús ipan amoxtin noso libros tlen okimijkuilojkej. Se itoka Marcos. Kanaj yejua okitak nochi tlen ipan onochiuj Jesús ijkuak okasikej. Okse itoka Lucas. Yejua katka tepajtiketl niman opeuj kitekichiuilia toTajtsin kanaj ijkuak yomijka Jesús.

Oksekimej omemej akin okijkuilojkej Biblia akin nesij ipan tlaixkopinajli yejuamej ikniuan Jesús akin ok telpokamej. ¿Tikmatstika kenon intoka?... Se itoka Santiago niman okse Judas. Yejuamej kachtopa xkineltokayaj Jesús. Kinemiliayaj ika xok kipiaya itlamachilis. San ika, okineltokakej Jesús niman onochiujkej inomachtijkauan.

Okse akin okijkuilo Biblia tlen nesi ipan tlaixkopinajli itoka Pablo. Ijkuak xnochiuaya inomachtijkauj Cristo, yejua itoka katka Saulo. Melak kintlauelitaya inomachtijkauan Cristo niman melak kintlajyouiltiaya. ¿Tikmatstika kenon Pablo onochiuj inomachtijkauj Cristo?... Se tonajli, yaya ipan ojtli ijkuak okikak ika yakaj kuajnotstoya iluikak. ¿Tikmatstika akinon kuajnotstoya? ¡Katka Jesús! Niman yejuin tlen okitlajtolti Pablo: “¿Tleka tlemach tlen xkuajli tikinchiuilia akin nechneltokaj?” Sakin, Pablo onopatlak niman onochiuj inomachtijkauj Cristo. Pablo okijkuilo 14 amoxtin ipan Biblia, peua ipan Romanos niman ontlami ipan Hebreos.

Tejuamej mojmostla tikpouaj Biblia, ¿xmelak?... Pampa ijkon tikchiuaj, miyek tlemach tiuelij itech Jesús. ¿Tikuelitaskia timomachtis okseki itech Jesús?...