Tlajtolpaleuijli itech tlaneltokilistli, kenon touikaskej niman tlasojtlalistli

SANTIAGO niman Judas intlakpaikniuj katka Jesús, niman Pedro iuan Juan katkaj itlatitlankauan. Yejuamej nauimej okijkuilojkej ika iespíritu santo toTajtsin, chikome amatlajkuiloltin tlen nonextiaj ipan Tlajkuiloltin Griegas Cristianas, ompa kijtoua akinon okijkuilo. Ika yejon kinekiyaj kimpaleuiskej akin kichiuayaj ken Cristo mayolmelaujkanemikan niman nochipa matlanemilitokan ipan iTekiuajyo toTajtsin.

Tikteititis tlaneltokilistli. Xsan noneki tikijtos ika tikpiya tlaneltokilistli, noneki tikteititiskej. Ken kijtoua Santiago, “xitlaj kijtosneki itlaneltok se tlakatl tla xkichiua tlajtlamach tlen kuajli” (Santiago 2:26). Akin kixnamiki tlatlatalismej ika tlaneltokilistli melak yolchikaui. Niman noijki uelis kimatstos ika tla kitlajtlanilis toTajtsin tlamachilistli, kiselis. Tla yolmelaujkanemi itech Jehová, kuajli nemis ixpan (Santiago 1:2-6, 12). ToTajtsin nochipa kiminpaleuiya akin yolmelaujkanemij. Ika yejon, Santiago kijtoua: “Xnisiuikan Dios niman yejua mechnisiuis” (Santiago 4:8).

Akin kichiuaj ken Cristo noneki makichikauakan intlaneltokil niman ijkon uelis kimapeuaskej tlatlatalismej niman nochi tlen uelis kimijtlakos. Judas, akin chantiya kampa onkatka melak tsokuiltik auilnemilistli, yejua kijtoua: “Xmanauikan on tlamachtijli yejuan tikneltokaj” (Judas 3).

Matikpiyakaj tonemilis chipauak. Jehová kichia ika akin kitekichiuiliaj machipaujkanemikan ipan nochi iminemilis. Pedro okijkuilo: “Yej xchijchipajtiakan ikan nochi tlen nenkichiuaskej [...] Dios kijtoua ipan on Yektlajkuilojli: ‘Nemejuamej xchijchipajtiakan pampa nejua [Jehová] nichipauakʼ” (1 Pedro 1:15, 16). Tla kinekij ijkon kichiuaskej noneki makixkopinakan Cristo, itech akin Pedro okijto “niman ijkon omechititij ken ijki no noneki nenkichiuaskej” (1 Pedro 2:21). Maski kemantika ouijtika kitlakamatiskej itlanauatiluan toTajtsin, tlen melak noneki ‘ma ka xkauilikan nemotlamachilis ma mechtlajtlakolmakaʼ (1 Pedro 3:16, 17). Pedro kuajli kijtoua ika, noneki makipiyakan chipauak iminemilis niman makiteititikan ika yemelak kiueyichiuaj toTajtsin niman ijkon makichiakan Tonajli ijkuak Techyolkuitiskej niman yenkuik tlaltikpaktli kampa, “nochimej nouikaskej yolmelajkej” (2 Pedro 3:11-13).

Tikteititis tlasojtlalistli. “Dios yejua tetlajsojtlalistli”, kijtoua Juan. Jehová okiteititi kenon melak techtlasojtla ijkuak okuajtitlan iKoneuj niman “omik [...] para techtlapojpoluilia totlajtlakoluan”. ¿Tlenon noneki tikchiuaskej pampa otechititijkej yejuin tlasojtlalistli? Juan techijlia: “Notlajsojkaikniuan, tla Dios sanoyej ijkon otechtlajsojtlak, no ijki noneki titotlajsojtlaskej inuan oksekimej” (1 Juan 4:8-11). Tikteititiaj ika tikintlasojtlaj tokniuan ijkuak kuajli tikinseliaj tochan (3 Juan 5-8).

¿Kenon kiteititiaj akin kichiuaj ken Cristo ika yemelak kitlasojtlaj Jehová? Juan technankilia: “Ijkuak tiktlakamatij itlanauatiluan Dios, sa no yejua tiktlajsojtlaj. Niman itlanauatiluan xyejyetikej” (1 Juan 5:3; 2 Juan 6). Akin kitlakamatij toTajtsin kimatstokej ika nochipa kipiyaskej Itlasojtlalis niman kichiaskej “nemilistli para nochipa” (Judas 21).

(Onokixti itech Santiago, 1 Pedro, 2 Pedro, 1 Juan, 2 Juan, 3 Juan niman Judas.)